Բաղրամյան պողոտայում բախում տեղ ունեցավ ոստիկանության եւ ցուցարարների միջեւ: Ցուցարարները ճեղքեցին ոստիկանական արգելապատնեշներն ու ոստիկաններին ու հասան Սահմանադրական դատարանի մոտ, որտեղ փշալարեր են տեղադրված:
Մինչ այդ բանակցություններ էին ընթանում «Քաղաքացիական պայմանագիր» կուսակցության քաղխորհրդի անդամ Նիկոլ Փաշինյանի եւ Երեւանի փոխոստիկանապետ Վալերի Օսիպյանի միջեւ, որպեսզի բացեն ոստիկանական արգելապատնեշը:
«Ձեր եւ ձեր խմբակցության երեք պատգամավորներին թույլ կտանք գնալ Ազգային ժողով,-ասաց Օսիպյանը:
Ի պատասխան Փաշինյանը պատասխանեց. «Ոստիկանները չեն կարող ինձ հետ պայման դնել, թե ինչպես գնամ իմ աշխատանքի վայր: Ես եմ գնում, նաեւ լրագրողները, նաեւ այն մարդիկ, որոնք իմ մոտ ընդունելության են: Քաղաքացիները դիմումներով ինձ են դիմել, բոլորին պետք է ընդունեմ»:
Վալերի Օսիպյանը նշեց, որ դա հնարավոր չէ, ինչին Փաշինյանը պատասխանեց. «Այդպես լինելու է»:
«Դուք էինք ասում, որ ձեր նախաձեռնությունը դեմ է սադրիչ գործողություններին, բռնությանը: Դե հրեք, գցեք գետնին ինձ ու մյուս ոստիկաններին ու գնացեք. պատնեշը չի բացվելու, պարոն Փաշինյան: Բախմա՞ն եք տանում, ի՞նչ եք շահելու: Մենք հանգիստ կանգնած ենք, դուք եք եկել»-ընդգծեց Օսիպյանը:
«Դուք չեք կարող ասել, թե ես որտեղից անցնեմ»,-ասաց Փաշինյանը եւ անցավ արգելապատնեշի վյրայից:
Այդ պահին հրմշտոց սկսեց, եւ ցուցարարները ճեղքելով շղթան բարձարացան Բաղրամյան պողոտայով:
Նշենք, որ այսօր առավոտից ցուցարարները փակելով անցել են Երեւանի կենտրոնի մի շարք փողոցներով: Այդ ընթացքում տարբեր խմբեր փակել են Մոսկովյան, Սարյան, Աբովյան, Կորյուն, Նալբանդյան, Սայաթ-Նովա փողոցները, Մաշտոց եւ Բաղրամյան պողոտաները:
Նախօրեին Նիկոլ Փաշինյանը կոչ էր արել երկուշաբթի օրը արգելափակել Երեւանի կամուրջները, փողոցները մետրոն. «Վաղը առավոտյան 8:15-ից պետք է սկսվեն քաղաքացիական անհնազանդության գործողություններ։ Այդ գործողությունները որեւէ մեկին որեւէ վնասի եւ ռիսկի տակ չեն դնում»,- ասել է նա:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որն ավարտվել է ապրիլի 13-ին, Ազատության հրապարակում շուրջօրյա հանրահավաքով, ապա նստացույցով Ֆրանսիայի հրապարակում: Նրանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցեն ԱԺ-ում վարչապետի ընտրությանը: «Ելք» դաշինքի մյուս երկու կուսակցությունները՝ «Լուսավոր Հայաստանը» եւ «Հանրապետությունը» չեն միացել այս պայքարին:
Հիշեցնենք, որ ապրիլի 17-ին ԱԺ հատուկ նիստում տեղի կունենա վարչապետի ընտրությունը: ՀՀԿ-ն վարչապետի թեկնածու կառաջադրի Սերժ Սարգսյանին:
- Ոստիկանությունը փակել է դեպի կառավարական ամառանոցներ տանող փողոցը. Ցուցարարները թեքվեցին դեպի Սարյան փողոց
- «Եթե մեզ խփեն, մենք առաջ ենք գնալու». Ցուցարարները փակեցին նաեւ Խանջյան փողոցը. նրանք նստեցին փողոցում (Ֆոտո)
- Բախում ոստիկանության շենքի մոտ. ցուցարարները Փաշինյանի գլխավորությամբ ճեղքեցին ոստիկանական շղթան (ուղիղ, Ֆոտո)
- Խաղաղ, սակայն հասարակական կարգի խմբային խախտումներով ուղեկցվող հավաքի իրավունքը բացարձակ չէ. Ոստիկանություն
- Ինչպիսի՞ իրավիճակ է Երեւանի կենտրոնում. ցուցարարներին է միացել նաեւ «Կարգին Հայկոն» (ուղիղ, Ֆոտո)
- Մետրոպոլիտենի գնացքները «Բաղրամյան» կայարանում կանգառներ չեն կատարի
- Եթե ԱԺ նիստը լինի արտագնա. Երեւանը կվերցնենք մեր հսկողության տակ. Փաշինյան (ուղիղ, Ֆոտո)
- Փակ են Աբովյան, Մոսկովյան, Սարյան փողոցները, Մաշտոց ու Բաղրամյան պողոտաները. Փաշինյան (Ֆոտո)
- Փաշինյանն ու իր կողմնակիցները փակել են Բաղրամյան պողոտան. ոստիկանները շղթա կազմեցին (Ֆոտո)
- Ոստիկանությունը հորդորել է Փաշինյանին եւ նրա կողմնակիցներին զերծ մնալ իրավախախտումներ պարունակող գործողություններից
- Ցուցարարները փորձեցին փակել մետրոյի «Երիտասարդական» կայարանը, սակայն չհաջողվեց
