Ֆրանսիայի եւ Մեծ Բրիտանիայի ԱԳ նախարարներ Ժան-Իվ Լե Դրիանը եւ Բորիս Ջոնսոնը հայտարարել են, որ ապրիլի 16-ի Լյուքսեմբուրգում հանդիպման ժամանակ ԵՄ երկրների նախարարներին տեղեկացրել են Սիրիայում ռազմական ակցիայի մանրամասների մասին, փոխանցում է ՏԱՍՍ-ը:
«Այս առավոտյան ես եւ իմ բրիտանացի գործընկեր Բորիս Ջոնսոնը հնարավորություն ունեցանք շարադրելու գործողության էությունն ու խնդիրները, որը ԱՄՆ-ի հետ նախաձեռնել էինք Սիրիայում քիմիական զենքի հետ կապված օբյեկտների դեմ: ԵՄ-ն եւ անդամ երկրները աջակցել են քիմիական զենքի ցանկացած օգտագործում կանխելու մեր ձգտմանը»,- բանակցություններից հետո լրագրողներին ասել է Լե Դրիանը:
Ավելի վաղ Բորիս Ջոնսոնը հայտարարել էր, որ ԱՄՆ-ի, Մեծ Բրիտանիայի եւ Ֆրանսիայի Սիրիային հասցված հարվածները, ցավոք, չեն կարող բեկել պատերազմի ընթացքը եւ չեն բերի Դամասկոսում իշխանափոխության:
«Այս հարվածները չեն բեկի պատերազմի ընթացքը եւ չեն բերի ռեժիմի փոփոխության: Ցավոք, դրանք թույլ չեն տա Ասադին հանել: Դրանց նպատակը հստակ հայտարարելն էր, որ մենք այլեւս չենք հանդուրժի քիմիական զենքի կիրառումը»,- ասել էր նա: Ջոնսոնը նաեւ հայտնել էր, որ լիովին գոհ է արաբական հանրապետության դեմ ագրեսիային գործընկեր երկրների արձագանքից:
