Լուսաձայնային նռնակների օգտագործումից բացի՝ մինչեւ այս պահը ոստիկանության գործողություններն ընդունելի եմ համարում: Այս մասին այսօր՝ ապրիլի 17-ին լրագրողների հետ զրույցում ասաց «Ելք» խմբակցության պատգամավոր Արամ Սարգսյանը:
«Պետք է փորձենք դուրս գալ ուղիղ բախումներից, փշալարարերն անցնելու անհեռանկար տարբերակներից, փորձենք ընդհանուր եզրեր գտնել, փորձենք էս պարագան չդարձնենք հենց հիմա, հենց էս պահին, հենց էսօր լինելու խնդիր, այսինքն` մաքսիմում պետք է խուսափել «հիմա» կարգախոսից: «Հիմա»-ն անհեռանկար առճակատման ճանապարհ է, պետք է ավելի երկար պայքարի ճանապարհ մտածել»,- ասաց նա:
Արամ Սարգսյանը հավելեց, որ հանրությունn իր 100 տոկոսի մեջ իշխանափոխության պահանջ ունի. «Ես երբեք չեմ ասել, որ հանրային պահանջ չկա, ուղղակի խնդիրն այն է, թե այդ հանրային պահանջն ինչպես է ձեւակերպվում եւ ինչպես է պատվիրակվում»:
NEWS.am-ի լրագրողի հարցին, թե Նիկոլ Փաշինյանիn չմիանալու համար շատ քաղաքացիներ իրեն «դավաճան» են համարում, Արամ Սարգսյանն արձագանքեց, որ շատ պայծառ երեւակայություն է պետք՝ իրեն դավաճան անվանելու համար, եւ այդ մարդկանց խորհուրդ տվեց արվեստով զբաղվել:
Արամ Սարգսյանը կարծում է, որ այս պահին երկրում տեղի ունեցող գործընթացները հանրության արձագանքն են իշխանություններին, ինչը նաեւ միջազգային մամուլում անդրադարձավ:
Նշենք, որ այսօր ապրիլի 17-ին ԱԺ հատուկ նիստում ընտրելու են վարչապետի թեկնածուին:
Ավելի վաղ NEWS.am-ի հետ զրույցում ԱԺ փոխխոսնակ Էդուարդ Շարմազանովը հայտնել էր, որ ՀՀԿ խմբակցության ղեկավար Վահրամ Բաղդասարյանը կներկայացնի ՀՀԿ-ի թեկնսծուին, նրան կդիմեն հարցերով: Այնուհետեւ ՀՀԿ վարչապետի թեկնածու Սերժ Սարգսյանը կներկայացնի իր ծրագիրը, կպատասխանի հարցերին, հետո կգրանցվեն պատգամավորները ելույթների համար, այնուհետեւ եզրափակիչ ելույթ կլինի եւ քվեարկություն:
