Քննչական կոմիտեի Լոռու մարզային քննչական վարչությունում քրեական գործ է հարուցվել՝ «Վանաձորի պետական բժշկական քոլեջ» ՊՈԱԿ-ի պահակի նկատմամբ ավազակային հարձակում կատարելու դեպքի առիթով: Այս մասին տեղեկացնում է ՀՀ ՔԿ մամուլի ծառայությունը:
Նախնական տվյալներով՝ 2018 թվականի ապրիլի 15-ին ժամը 01:00-ի սահմաններում դիմակավորված երկու անձինք տեխնիկական միջոցների գործադրմամբ բացել են «Վանաձորի պետական բժշկական քոլեջ» ՊՈԱԿ-ի մասնաշենքի մուտքի դուռը եւ մուտք գործել մասնաշենք: Այնուհետեւ ենթադրյալ հանցագործություն կատարած անձինք որպես զենք օգտագործվող առարկայի՝ դանակի եւ ատրճանակի գործադրման սպառնալիքով, կպչուն ժապավենով եւ հեռախոսալարերով կապել են կազմակերպության գիշերային պահակի ձեռքերը եւ ոտքերը, ջարդել տարբեր աշխատասենյակների դռներ եւ տնօրենի աշխատասենյակից հափշտակել առկա գումարը:
Դեպքի առիթով նույն օրը ՔԿ Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ կետերով և 235-րդ հոդվածի 1-ին մասով, կատարվել է դեպքի վայրի զննություն, ՊՈԱԿ-ի պահակը ճանաչվել է տուժող, մշակվել է քննչական պլան: Դեպքի վայրից առգրավվել են ձեռնոցներ, դիմակ: Նշանակվել է դատաբժշկական փորձաքննություն:
Հանձնարարություններ են տրվել ոստիկանության համապատասխան բաժնին՝ միջոցներ ձեռնարկել ենթադրյալ հանցագործություն կատարած անձանց ինքնությունը պարզելու և վարույթն իրականացնող մարմնին ներկայացնելու ողությամբ:
Նախաքննությունը շարունակվում է:
