Չինական Fortune Oil-ի գործադիր տնօրեն Տի Կիամ Պունը հայտարարել է, որ ընկերությունն ուրախ է ներդրում կատարել Հայաստանի երեք երկաթահանքերում եւ իրացնել նոր ռեսուրսային ռազմավարություն:

NEWS.am-ը տեղեկացրել էր, որ Հոնկոնգում գտնվող Fortune Oil ընկերությունը, որը նեդրումներ է իրականացնում Չինաստանի նավթային եւ գազային նախագծերում, հունվարի 12-ին 24 միլիոն դոլար է ներդրել Bounty Resources Armenia Limited ընկերության կապիտալի 35 տոկոսը ձեռք բերելու համար:  Bounty Resources Armenia Limited-ին են պատկանում Աբովյանի, Հրազդանի եւ Սվարացի երկաթահանքերը: Fortune Oil-ի պաշտոնական կայքը հաղորդում է, որ այդ հանքավայրերի լիցենզիան տրվել է Nagin ՍՊԸ-ին, որը Caspian Bounty Steel Limited-ի դուստր ընկերությունն է: Caspian Bounty Steel Limited-ն էլ Bounty Resources Armenia Limited-ի դուստր ընկերությունն է:

Fortune Oil-ը նաեւ 2 միլիոն դոլարով գնել է փոքրամասնությունում մնացած CBSL-ի 16,7 տոկոս բաժնետոմսերը: BRAL-ում եւ CBSL-ում արվող ներդրումները ֆինանսավորվում են ընկերության կանխիկ պահուստային միջոցներով:

Պայմանագրի համաձայն` Fortune Oil-ն ունի հնարավորություն BRAL-ի կապիտալի եւս 15 տոկոսի դիմաց կատարել  լրացուցիչ 16 միլիոն դոլարի ներդրում: Դրա արդյունքում ամբողջ ներդրումը կկազմի 40 միլիոն դոլար, որով Fortune Oil-ին կանցնի BRAL-ի կապիտալի 50 տոկոսը:

BRAL-ն այժմ ունի միայն մեկ երկրորդ բաժնետեր` Bounty Investment Holdings Limited, որը ներդրումային հոլդինգային ընկերություն է: Այն տարբեր նախագծեր է իրականացնում էներգետիկայի եւ ռեսուրսային ոլորտներում: Fortune Oil-ը բոլոր ներդրումները Հայաստանում իրականացնում Giant Global Development Limited դուստր-ընկերության միջոցով:

Չինական Fortune Oil-ի գործադիր տնօրեն Տի Կիամ Պունը հայտարարել է, որը Չինաստանում գրանցվում է ռեսուրսների պահանջարկի մշտական աճ եւ հայկական հանքավայրերի զգալի պաշարները համագործակցությունը գրավիչ են դարձնում եւ առաջիկա տարիներին այս դրական ներդրման շնորհիվ ընկերությունը թռիչքաձեւ առաջընթաց է սպասում:

2000-2010թթ. երկաթահանքի ներկրումը Չինաստան 69 միլիոն տոննայից հասել է 619 միլիոն տոննայի: 2011-ին սպասվում է երկաթահանքի ներկրման աճ մինչեւ 712 միլիոն տոննա:

Հայկական հանքավայերի մասին.

Հրազդանի հանքավայրի շահագործումը կսկսվի առաջինը: Երկաթահանքն ունի բարձ որակ` 40% երկաթ, շատ մոտ է գտնվում երկրի մակերեսին: Ենթակառուցվածքների` ջրագծերի, երկաթգծի, ավտոմայրուղիների, լոկալ էլեկտրակայանի առկայությունը հնարավորություն է տալիս արագ շահագործել հանքավայրը: Սկիզբը նախատեսվում է 2014-ին` տարեկան 1,5-2,0 միլիոն տոննա հզորությամբ: Երկաթահանքային խտանյութի քանակը կկազմի տարեկան 800 հազարից մինչեը 1 միլիոն տոննա: Հրազդանի պաշարները կազմում են 77 միլիոն տոննա: Դրանցից 37 միլիոնը հաստատված է, 40 միլիոնը` հավանական: Շահագործումը նախատեսվում է իրականացնել 15 տարում: Արտադրանքը երկաթգծով կտեղափոխվի կամ Վրաստանի, կամ Թուրքիայի, կամ Իրանի նավահանգիստ: Վերջնական շուկան կլինի Չինաստանը:  

Աբովյանի հանքավայրի շահագործումը կսկսվի երկրորդը: Պաշարներն ավելի խորադիր են, քան Հրազդանում: Աբովյանի հանքավայրի պաշարները գնահատվում են 255 միլիոն տոննա` 84 միլիոն տոննա հաստատված եւ 171 միլիոն տոննա հավանական, ինչը թույլ կտա տարեկան մոտ 20 միլիոն տոննա երկաթահանք մշակել եւ արտադրել 8 միլիոն տոննա խտանյութ: Աբովյանի ենթակառուցվածքային բազան նույնն է, ինչ Հրազդանում: Աբովյանի հանքավայրը նախատեսվում է շահագործել 10 տարում:

Սվարանցի հանքավայրի շահագործումը կսկսվի վերջինը: Դրա գնահատումը գտնվում է սկզբնական փուլում: Սվարանցի պոտենցիալ պաշարները գնահատվում են 1500 միլիոն տոննա:

BRAL ընկերությունը գրանցվել է 2010թ. հունիսին: BRAL-ի միակ ակտիվն անուղղակի մասնակցությունն է նշված հանքերի կապիտալում: Ընկերությունը դեռեւս շահույթ չի գրանցել: