Եվրամիությունը պետք է նոր անդամներ ընդունի ի դեմս Արեւմտյան Բալկանների երկրների, որպեսզի խուսափի նոր պատերազմի վտանգից: Այս մասին Եվրախորհրդարանում ելույթի ժամանակ հայտարարել է Եվրահանձնաժողովի ղեկավար Ժան Կլոդ Յունկերը, հաղորդում է Reuters-ը:
«Եթե մենք բարդ տարածաշրջանում այդ երկրների համար դուռ չբացենք, եթե մենք նրանց համար եվրոպական հեռանկար չբացենք, մենք կտեսնենք, որ պատերազմը կվերադառնա այնտեղ, ինչպես դա եղավ 1990-ականներին», - ասել է Ժան Կլոդ Յունկերը:
Ապրիլի 17-ին հրապարակված զեկույցում Եվրահանձնաժողովը պաշտոնապես առաջարկել է Ալբանիայի հետ անդամակցելու վերաբերյալ բանակցություններ սկսել, որը 2014 թվականին Եվրամիության պաշտոնական թեկնածու երկիր դարձավ:
ԵՀ-ն նաեւ առաջարկել է անդամակցության բանակցություններ Մակեդոնիայի հետ անցկացնել, սակայն այդ գործընթացը հետաձգվում է երկրի անվանման պատճառով Հունաստանի հետ տարաձայնությունների պատճառով:
Շատ պաշտոնատար անձինք հույս ունեն, որ հունիսին ԵՄ ղեկավարների գագաթաժողովին ԵՄ կառավարությունները կարող են Ալբանիայի եւ հնարավոր է նաեւ Մակեդոնիայի հետ անդամակցության մասին բանակցություններին հավանություն տալ: