Հայաստանի Հանրապետությունում հանրային անվտանգության պատրաստվածության մակարդակի բարձրացման, ինչպես նաեւ՝ 2018թ.-ի համապետական միջոցառումներին ընդառաջ ՀՀ արտակարգ իրավիճակների նախարարի պաշտոնակատար Դավիթ Տոնոյանի հանձնարարությամբ՝ հայտարարվել է «Հակահրդեհային պատրաստվածության մակարդակի բարձրացման փուլ», որի շրջանակներում ուսումնավարժություններ են անցկացվում հյուրանոցային ու ռեստորանային համալիրներում, սննդի կետերում, առեւտրի եւ ժամանցի խոշոր կենտրոններում:Նպատակն է բարձրացնել ՀՀ ԱԻՆ փրկարար ծառայության անձնակազմի՝ սեղմ եւ ճգնաժամային պայմաններում հրդեհներին արձագանքման մասնագիտական հմտությունների եւ տնտեսվարող սուբյեկտների անձնակազմի հակահրդեհային պատրաստվածության մակարդակն ու միմյանց հետ փոխգործակցության արդյունավետությունը:
Ապրիլի 17-ին ժամը 21:45 «Դալմա Գարդեն մոլ» առեւտրաժամանցային կենտրոնում սկսվեց ԱԻՆ փրկարար ծառայության հատուկ տակտիկական ուսումնավարժությունը՝ «Հրդեհի դեպքում կազմակերպության աշխատակիցների եւ քաղաքացիների տարահանումը» թեմայով: Ուսումնավարժանքի ընթացքին հետեւում էր Փրկարար ծառայության տնօրեն, փ/ծ գեներալ-մայոր Մուշեղ Ղազարյանը: Ըստ ուսումնավարժանքի պլանի՝ հրդեհն առաջացել էր «Դալմա Գարդեն Մոլ» առեւտրաժամանցային համալիրի 2-րդ հարկի առեւտրի կետում: Ըստ սցենարի՝ առեւտրաժամանցային կենտրոնում հրդեհաշիջման ինքնաշխատ համակարգը չի գործել, աշխատակիցների կողմից ձեռնարկվել են նախնական հրդեհաշիջման աշխատանքներ, սակայն հրդեհը մարել չի հաջողվել եւ այն տարածվել է 2-րդ հարկի մյուս առեւտրի կետերում: Երկրորդ հարկը ամբողջությամբ ծխապատ է եւ այդ գոտում կան մարդիկ: Հրշեջ փրկարարական ստորաբաժանումների ժամանման պահին հրդեհի մակերեսը կազմել է 30քմ: Ահազանգից հետո ժամանելով դեպքի վայր՝ փրկարարները առեւտրի կենտրոնի անձնակազմի հետ միասին կազմակերպեցին մարդկանց արագ տարահանումը, օգտագործելով հատուկ փրկարարական տեխնիկա՝ զուգահեռ իրականացնելով նաեւ հրդեհաշիջման աշխատանքներ: Ուսումնավարժանքին ներգրավված էին ԱԻՆ փրկարար ծառայության 6 մարտական հաշվարկ, մեկ ավտոսանդուղք: Ժամը 22:25 ազդարարվեց ուսումնավարժանքի ավարտը: Ոսումնավարժանքի ղեկավարը զեկուցեց փրկարար ծառայության տնօրենին, որ ուսումնավարժանքի սցենարով հրշեջ-փրկարարների առաջ դրված բոլոր խնդիրները կատարված են: Ուսումնավարժանքի արդյունքներն ընդհանուր առմամբ գնահատվեցին բավարար:
Ուսումնավարժանքին ակտիվ մասնակցեցին նաեւ առեւտրաժամանցային կենտրոնում գտնվող քաղաքացիները, որոնք նույնպես հնարավորություն ունեցան հրդեհի ժամանակ վարքականոնների պահպանման որոշակի հմտություններ ձեռք բերել:
