Գյումրիում բազմաթիվ ուսանողներ ու դպրոցականներ, այսօր՝ ապրիլի 18-ին, «Դասադուլ», «Միացեք» վանկարկումներով դուրս են եկել երթի: Նրանք շարժվել են դեպի ուսումնական հաստատություններ եւ պահանջել են թույլ տալ աշակերտներին ու ուսանողներին միանալ ցույցին:
Հայաստանի ազգային պոլիտեխնիկական համալսարանի Գյումրիի մասնաճյուղում ցուցարարներին թույլ չեն տվել մտնել մտնել համալսարանի շենք:
Ցուցարարների եւ ոստիկանների մեջ փոքր բախումներ են լինում: Մասնավորապես, Գարեգին Նժդեհ հրապարակից բերման է ենթարկվել մեկ երիտասարդ, որին որոշ ժամանակ անց ազատ են արձակել:
Բողոքի ակցիա է տեղի ունենում նաեւ Վանաձորում. «Քայլ արա ու Ընդվզիր» բողոքի ակցիաների մասնակիցները իրենց գործողությունները երեկվանից իրականացնում են համատեղ։ Վանաձորից NEWS.am-ի թղթակիցը հաղորդում է, որ բողոքի երթը վանաձորցիները «Երկիր ծիրանի» կուսակցության նախագահ Զարուհի Փաստանջյանի հետ սկսել են Վանաձորի թիվ 5 դպրոցի մոտից։ Փոստանջյան ու ներկաները հանդես են եկել հայտարությամբ, դպրոցի կոլեկտիվին ու դպրոցականներին կոչ անելով միանալ շարժմանը։
Ապա խումբը երթով շարժվել է քաղաքի գլխավոր հրապարակ, այնուհետ՝ թիվ 11 դպրոց, տարածաշրջանային քոլեջ ու Կինոյի ու թատրոնի Վանաձորի մասնաճյուղ։ Կրթական հաստատությունների դռները ցուցարարների առջեւ փակ էին։ Որոշ կրթօջախներում ցուցարարներին հաջողվում էր մուտք գործել, իսկ որոշ կրթական հաստատություններ նրանց մուտքը կտրականապես արգելում էին։
Վանաձորի պետական համալսարանի մուտքի մոտ Փոստանջյանը համալսարանի դասախոսական կազմին կոչ է արել ոչ միայն ուսանողներին չարգելել ցույցերին մասնակցել, այլեւ իրենք էլ միանան ակցիային:
Համալսարանի մոտից ակցիայի մասնակիցները ուղղություն են վերցրել դեպի քաղաքի գլխավոր հրապարակ՝ Լոռու մարզպետարանի ու Վանաձորի քաղաքապետարանի մոտ։ Ողջ երթի ընթացքում մասնակիցներին ուղեցում են ոստիկանական խմբեր։ Ակցիան մինչ այժմ ընթացել է առանց բախումների։
Բողոքի ակցիա է տեղի ունեցել նաեւԱրմավիր քաղաքում, որտեղ մի քանի տասնյակ քաղաքացիներ դուրս են եկել փողոց եւ կոչ արել բոլորին միանալ իրենց պայքարին: Որոշ դպրոցների դռներ փակ են եղել: Տնօրենները պարզաբանում էին, որ պատճառն այն է, որ դասապրոցես է ընթանում։