Ցուցարարները «Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ Երեւանի քաղաքապետարանի մոտ նստացույցն ավարտելով շարժվեցին դեպի ԱԳՆ շենք: Նրանք կրկին փակեցին ԱԳՆ շենքի մուտքը:
Փաշինյանը կոչ արեց կանգնել դռների դիմաց: Նա կոչ արեց ներսում գտնվողներին եւ միանալ իրենց պայքարին:
Նիկոլ Փաշինյանը հայտարարեց, որ բողոքի ակցիայի կազմակերպիչների հետ միասին 1-1,5 ժամ հեռանում են «Քաղաքացիական պայմանագիր» կուսակցության գրասենյակ՝ խորհրդակցություն անցկացնելու, հետագա անելիքները քննարկելու, իսկ մինչ այդ ԱԳՆ-ի մոտ պատասխանատու է նշանակվում Շահեն Հարությունյանը:
Հիշեցնենք, որ երեկ՝ ապրիլի 17-ին եւս ցուցարարները երթով հասել էին ԱԳՆ շենք ու որոշ ժամանակով արգելափակել մուտքը: Այս շենքում են գտվում նաեւ Սփյուռքի, Մշակույթի, Կրթության եւ գիտության, Արդարադատության նախարարությունները:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել:
Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:
Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով:
- Լարված իրավիճակ Մաշտոցի պողոտայում (վիդեո)
- «Տարոն դուրս արի». Ցուցարարները փակել են քաղաքապետարանի մուտքը (ուղիղ)
- Ոստիկանությունն ուժեր է կենտրոնացնում Ֆրանսիայի հրապարակում
- Նիկոլ Փաշինյանը դիմեց Սերժ Սարգսյանին (ուղիղ, ֆոտոռեպորտաժ)
- «Շրջափակում ենք Բաղրամյան 26-ը». Ցուցարարները փակեցին Բաղրամյան պողոտան. Ոստիկանները շղթա կազմեցին (ուղիղ, Ֆոտո)