Փոփոխությունների համաձայն` Facebook-ը թույլտվություն կխնդրի օգտատերերից՝ իր գործընկերների կայքերից գովազդներ եւ հավելվածներ առաջարկելու համար: Այս մասին նշվում է Facebook-ի հայտարարության մեջ, փոխանցում է «Կոմերսանտ»-ը:
Facebook սոցիալական ցանցը հայտարարել է օգտատերերի անձնական տվյալների պաշտպանության մեջ փոփոխությունների մասին, որպեսզի դրանք համապատասխանեն մայիսի 25-ին ուժի մեջ մտնող Անձնական տվյալների պաշտպանության մասին ԵՄ ընդհանուր կանոնակարգի խստագույն պահանջներին:
Facebook-ի փոփոխությունների համաձայն՝ սոցիալական ցանցը, մասնավորապես, թույլտվություն կխնդրի օգտատերերից՝ իր գործընկերների կայքերից գովազդներ եւ հավելվածներ առաջարկելու համար: Բացի այդ, այն օգտատերերը, ովքեր իրենց էջերում կիսվում են քաղաքական, կրոնական հայացքների եւ ընտանեկան կարգավիճակի վերաբերյալ տեղեկություններով, պետք է որոշեն՝ արդյոք ցանկանում են հասանելի պահել դրանք այլ օգտվողների եւ սոցիալական ցանցի համար, թե ոչ: Օգտատերերին նաեւ կհարցնեն՝ արդյոք նրանք ցանկանում են օգտագործել դեմքի նույնականացման տեխնոլոգիան:
Առաջինն այս շաբաթվա ընթացքում Facebook-ից նման հարցումներ կստանան ԵՄ-ի եւ Կանադայի օգտատերերը: Ավելի ուշ ընտրություն կարող են անել նաեւ աշխարհի մյուս մասերի օգտատերերը:
