2017-2018 թվականներին բացահայտվել են նաեւ անդրազգային հանցավոր խմբերի կողմից համակարգչային տեխնիկայի օգտագործմամբ, բանկերի համակարգչային ցանցեր ապօրինի ներթափանցելու, պահվող տեղեկատվությանը տիրանալու եւ դրա միջոցով առանձնապես խոշոր չափերով հափշտակություններ կատարելու դեպքեր: Այս մասին ասվում է ԱԱԾ տարածած հաղորդագրությունում
Այսպես`Հայաստանում գործող բանկից հափշտակություններ կատարելու դիտավորությամբ ՌԴ մի խումբ քաղաքացիներ միջնորդավորված եղանակով ՀՀ քաղաքացիներին չնչին գումարներով շահագրգռել են բացել արտարժույթային հաշվեհամարներ եւ ստացած բանկային քարտերը փոխանցել իրենց: Այնուհետեւ հանցավոր խմբի անդամները համակարգչային տեխնիկայի օգտագործմամբ՝ վնասաբեր ծրագրեր տարածելու միջոցով հեռակա հասանելիություն են ստացել բանկի համակարգչային ցանցին, ավելացրել այդ քարտերի զրոյական հաշվեկշիռներն ու կանխիկացման սահմանաչափը, որից հետո Մոսկվա, Սանկտ Պետերբուրգ եւ Ռիգա քաղաքներում գործող բանկոմատներից ՀՀ քաղաքացիների անվամբ բացված պլաստիկ քարտերով կանխիկացրել են շուրջ 160 հազար ԱՄՆ դոլարին համարժեք գումար։
Հիշյալ դեպքի առթիվ ՀՀ ԱԱԾ քննչական վարչությունում քննվող քրեական գործով ՀՀ 2 քաղաքացու մեղադրանք է առաջադրվել համակարգչային տեխնիկայի օգտագործմամբ կատարված հափշտակությանն օժանդակելու համար, բացահայտվել են նաեւ հանցա-գործության կատարմանը ներգրավված եւ ՀՀ-ից դուրս գտնվող մյուս անձանց ինքնությունները, որոնց հայտնաբերելու եւ պատասխանատվության ենթարկելու ուղղությամբ ձեռնարկվում են համապատասխան միջոցներ: