Արցախում ականի պայթյունից ժամկետային զինծառայող է զոհվել. մահացու վիրավորում է ստացել 20-ամյա Ռուսլան Մանուկյանը: Մահացած զինծառայողը Ստեփանավանից էր, 2 ամիս անց զորացրվելու էր: Ստեփանավանի զինկոմիսարիատից մեր թղթակցին հայտնել են, որ կրտսեր սերժանտը երկվորյակ եղբայր ունի, նույն զորամասում էին ծառայում: Եղբայրները սոցիալապես անապահով ընտանիքից են, մոր ու տատի խնամքին էին: Զինծառայողի մահվան դեպքի առիթով քրեական գործ է հարուցվել:
5 օր շարունակ Երեւանի կենտրոնում գիշերելուց հետո Նիկոլ Փաշինյանը երեկ ցուցարարներին հորդորեց տուն գնալ՝ կոչ անելով առավոտյան կրկին Ֆրանսիայի հրապարակ գալ: Ավելի ուշ, սակայն, Երեւանի կենտրոնում միջադեպ գրանցվեց. Մաշտոցի պողոտա-Թումանյան փողոց խաչմերուկում մի խումբ երիտասարդներ, բժշկական դիմակներով եւ ձողերով ու մետաղյա իրերով զինված, կոտրել են լուսաֆորներ, աղբարկղեր, ճանապարհային նշաններ եւ փորձել փակել ճանապարհները: Հետաքրքիր է, որ նրանք որեւէ կոչ չէին հնչեցնում, միայն բղավում էին եւ ջարդում: Արդեն առավոտյան Ֆրանսիայի հրապարակում Նիկոլ Փաշինյանը հայտարարեց, որ այդ անձինք իրենց հետո որեւէ առնչություն չունեն, ցույցի մասնակիցներ չեն, այլ սադրիչներ, որոնց, նրա համոզմամբ, իշխանություններն էին ուղարկել:
Նախօրեին Երեւանում տեղի ունեցած միջադեպի փաստով գլխավոր դատախազությունը քրեական գործ է հարուցել: Գիշերը 7 անձ բերման է ենթարկվել, ապա ազատ արձակվել. գործով ձերբակալված դեռեւս չկա: Տեղի ունեցած միջադեպը, ըստ Նիկոլ Փաշինյանի, իրենց գործողությունների վրա որեւէ ազդեցություն չի ունեցել: Պատգամավորի գլխավորությամբ ցուցարարներն այսօր կրկին շարունակեցին իրենց երթը մայրաքաղաքի փողոցներով: Բաղրամյան պողոտան այսօր արդեն բաց էր, եւ ցուցարարները շարժվեցին դեպի Բաղրամյան 26՝ նորանշանակ վարչապետի նստավայր: Ցուցարարները շուրջ 30 րոպե շրջափակեցին շենքը եւ կոչեր հնչեցրին:
Դրանից հետո ցուցարարները երթով շարժվեցին նախ դեպի Երեւանի պետական համալսարանի կենտրոնական մասնաշենք, ապա՝ Երեւանի քաղաքապետարան: Այստեղ արդեն ցուցարարները շուրջ 1 ժամ նստացույց արեցին: Նիկոլ Փաշինյանի գլխավորությամբ երթն ավարտվեց Հանրապետության հրապարակում: Այստեղ մեկնարկել է հանրահավաք, որին, ամենայն հավանականությամբ, կհաջորդի ավանդական երթը Երեւանի փողոցներով:
Նշենք, որ մինչ Փաշինյանը ցուցարարների հետ երթ էր անում փողոցներում, Ֆրանսիայի հրապարակում մնացած սակավաթիվ ցուցարարներին ոստիկանությունը հերթով բերման էր ենթարկում: Վերջին տվյալներով՝ այսօր բերման է ենթարկվել 84 քաղաքացի, որոնց մեծ մասն ավելի ուշ ազատ է արձակվել: Բերման ենթարկվածների թվում նաեւ անչափահասներ կային:
Ազգային ժողովի կողմից վարչապետ ընտրվելուց հետո Սերժ Սարգսյանը սկսել է նոր կառավարություն ձեւավորել: Նա 5-օրյա ժամկետում պետք է նախագահին առաջարկի փոխվարչապետերի եւ նախարարների թեկնածուներին: Այսօր Արմեն Սարգսյանն արդեն մի քանի հրամանագրեր է ստորագրել: Դրանցով Կարեն Կարապետյանը նշանակվել է առաջին փոխվարչապետ, Վաչե Գաբրիելյանն ու Արմեն Գեւորգյանը՝ փոխվարչապետեր: Նշանակվել են նաեւ առաջին նախարարները. պաշտպանության նախարարի պաշտոնում վերանշանակվել է Վիգեն Սարգսյանը, ԱԳ նախարարի պաշտոնում՝ Էդվարդ Նալբանդյանը:
Ազգային անվտանգության ծառայությունը հանցավոր խումբ է վնասազերծել: Խմբի անդամները հայաստանցիներ են, մի շարք քաղաքացիների բանկային հաշիվներից առանձնապես խոշոր չափերով գումար են հափշտակել: Նրանց թիրախում Արցախի 26 բնակիչներ են եղել: ԱԱԾ-ի տվյալներով՝ խմբի անդամներն ուսումնասիրել են «odnoklassniki.ru» սոցցանցի օգտատերերի տվյալները, հետո արտերկրում բնակվող նրանց ազգականների անվամբ կեղծ էջեր ստեղծել, նամակագրություն վարել եւ համոզել, որ ուզում են ֆինանսապես օգնել նրանց: Որոշ ժամանակ անց նրանք խնդրել ու ստացել են իրենց զոհերի բանկային քարտերի տվյալները եւ հաշիվների վրա առկա գումարները փոխանցել են իրենց բանկային քարտերին, ապա կանխիկացրել: Քրեական գործով հանցավոր խմբի 5 անդամ ձերբակալվել է, նրանց հանցակիցներին որոնում են: Նշված հանցագործությունից տուժած քաղաքացիները կարող են դիմել ԱԱԾ քննչական վարչություն:
Դոլարն ու եվրոն շարունակում են արժեզրկվել, թուլացել է նաեւ ռուբլին: Ապրիլի 18-ին դոլարի փոխարժեքը կազմել է 480 դրամ, եվրոյինը՝ 594, ռուբլունը՝ 7 դրամ 79 լումա, ֆունտինը՝ 682 դրամ:
Ապրիլի 19-ի գիշերը հանրապետությունում սպասվում է առանց տեղումների եղանակ, երեկոյան ժամերին շրջանների զգալի մասում՝ անձրեւ: Օդի ջերմաստիճանը 5-6 աստիճանով կբարձրանա: Երեւանում նույնպես վաղը երեկոյան ժամերին տեղումներ են սպասվում: Մայրաքաղաքում գիշերը կդիտվի +8+10, ցերեկը՝ +23+25 աստիճան տաքություն: