Գյումրիում այսօր՝ ապրիլի 19-ին, կրկին բողոքի քայլեր է տեղի ունեցել Սերժ Սարգսյանի վարչապետության դեմ: Վարդանանց հրապարակ հասած ակտիվիստների եւ ոստիկանների միջեւ փոքր բախումներ են տեղի ունեցել, որի հետեւանքով մի ցուցարար վնասվածք է ստացել եւ տեղափոխվել Գյումրիի բժշկական կենտրոն:
Ակցիայի մասնակիցները ցանկացել են քայլերթով շարժվել այն փողոցներով, որով իրենք են նախընտրում: Ցուցարարները նշել են, որ քանի որ երթն ինքնաբուխ է, իրենք կարող են գնալ որ կողմ ցանկանան:
Երիտասարդ ցուցարարներից մի քանիսին ոստիկանները բերման են ենթարկել:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել, այդ թվում անչափահասներ: Մասնավորապես միայն այսօր Երեւանում բերման է ենթարկվել 122 մարդ, որից 8-ն՝ անչափահասներ են:
Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:
Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով:
