Եթե ընդդիմությունը քննադատում է իշխանություններին դպրոցական երեխաներին քաղաքական պրոցեսներին ներգրավվելու մեջ, ապա դա չի արդարացնում հակառակը՝ ընդդիմության կողմից նրանց ներգրավվելը: Այս մասին այսօր՝ ապրիլի 19-ին, լրագրողների հետ զրույցում ասաց «Ելք» դաշինքի պատգամավոր Արտակ Զեյնալյանը:
«Ընդհանրապես անչափահասներին քաղաքական պրոցեսներին ներգրավվելու հետ կապված կան իրավակարգավորումներ, ինչպես կարող են նրանք իրենց իրավունքները պաշտպանել եւ ինչ միջոցներով: Մենք նախընտրական շրջանում քննադատել ենք ոչ միայն իշխանությանը այլ նաեւ այլ քաղաքական ուժերի եւս, որոնք ներգրավվել են դպրոցականների», - ասաց նա:
Լրագրողի դիտարկմանը, թե ի տարբերություն իշխանությունների, Նիկոլ Փաշինյանը նրանց կոչ չի արել դուրս գալ պայքարի, նրանք ինքնաբուխ են մասնակցում այդ հավաքներին, Արտակ Զեյնալյանը հարցով պատասխանեց լրագրողին, թե երեխաները ընտրական իրավունք ունեն, եւ բացասական պատասխան ստացավ:
Մյուս դիտարկմանը, թե հնարավոր է, որ երեխաները, իրենց ծնողների վիճակը տեսնելով, են դուրս եկել պայքարի, պատգամավորը այլեւս չցանկացավ շարունակել հարցազրույցը: