Ցուցարարները «Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ Կոմիտասի պողոտայից հասել են Դավիթաշեն:
Նա լրագրողների հետ զրույցում հայտարարեց, որ ապրիլի 24-ին անպայման երթով բարձրանալու են Ծիծեռնակաբերդի հուշահամալիր: Իսկ ավելի կոնկրետ այդ օրվա գործողությունների վերաբերյալ որոշում կկայացնեն ամսի 23-ին՝ ելնելով ստեղծված իրավիճակից. «Սա ցանցային պայքար է, երբեմն քաղաքացիներն իրենք են որոշում անելիքները: Եթե Սերժ Սարգսյանն այդ օրը լինելու է Ծիծեռնակաբերդում, ես կարծում եմ՝ մարդիկ ուզում են այդ օրը առերես հանդիպում կազմակերպել նրա հետ: Մենք կքննարկենք այդ սցենարը եւ եթե տեսնենք, որ այդ տարբերակն աջակցություն ունի, լրջորեն կմտածենք նաեւ դրա մասին»,-ասաց նա:
Հարցին, թե իրեն տեսնում է վարչապետի պաշտոնում, եթե Սերժ Սարգսյանը հրաժարական տա, Փաշինյանը պատասխանեց, որ չի կարող նման հայտարարություն անել. «Որովհետեւ մեր գլխավոր խնդիրը թավշյա հեղափոխությունը հաջող ավարտին հասցնելն է»:
«Կստեղծվի հեղափոխական կոմիտե, հիմա աշխատում ենք դրա վրա, բայց բուն գործընթացն ավելի կարեւոր է, քան կազմակերպչական մարմնի ձեւավորումը»,-հայտարարեց Փաշինյանը:
Նշենք, որ նախօրեին Նիկոլ Փաշինյանը հայտարարել է, որ այսօր՝ ապրիլի 20-ին, իրենք կրկին վերադառնալու են Երեւանի փողոցները տոտալ շրջափակելու ակցիային եւ դա պետք է լինի ցանցային՝ Երեւանի բոլոր թաղամասերում: Նա նշել է, որ փակելու են նաեւ մետրոյի կայարանները։ Փաշինյանը բոլորին կոչ է արել վաղը գործի չգնալ կամ միանալ իրենց։
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել, այդ թվում անչափահասներ:
Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝ ՀՀ քրեական օրենսգրքի 225-րդ հոդվածի հատկանիշներով:
Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով: