Բրիտանական մեքենաշինական Bentley Motors ընկերությունը հետայսու իր պաշտոնական ներկայացուցչությունն ունի նաեւ Հայաստանում՝ ի դեմս Bentley Yerevan-ի (ֆոտոռեպորտաժ)։
Հայաստանում մի շարք աշխարհահռչակ ապրանքանիշերի պաշտոնական ներկայացուցիչ հանդիսացող Դերժավա-Ս Գրուպի-ը, հայ սպառողին է ներկայացնում նաեւ ավելի քան 100 տարվա պատմություն ունեցող Bentley ապրանքանիշը, որի պաշտոնական բացման հանդիսավոր արարողությունը տեղի ունեցավ ապրիլի 19-ին Երեւանում (Ծովակալ Իսակովի 32/1 հասցեում)։
Bentley Yerevan ցուցասրահում ներկայացված են LUXE դասի ավտոմեքենաներ, որոնք բացառապես ձեռագործ են՝ ինչպես թելադրում է լեգենդար ապրանքանիշի ավանդույթը՝ նրանց համար, ովքեր գնահատում են շքեղությունը, արագությունը, հարմարավետությունն ու որակը։
Խանութի բացման արարողության ժամանակ Bentley Russia & Region East-ի կառավարիչ Մարկո Վան Ալթենը (Marco van Aalten) լրագրողներին հետ զրույցում նախ շնորհակալություն հայտնեց հայաստանյան նորկայացուցչին, Դերժավա-Ս Գրուպի-ին՝ ի դեմս Համբարձումյանների ընտանիքի՝ հայտնելով, որ Bentley Motors –ը հայաստանյան շուկայում ունի հավատարիմ հաճախորդների բանակ, որոնք հետաքրքրված են Bentley ավտոմոբիլներով, քանի որ գնահատում են որակը, հարմարավետությունն ու շքեղությունը։
«Հենց այդ պատճառով էլ այստեղ ներկայացուցչություն ունենալը շատ կարեւոր է Bentley Motors ընկերության համար։ Մենք ցանկանում ենք լինել ամենուր, որտեղ ապրում են մեր հաճախորդները»,-նշել է տարածաշրջանում Bentley ապրանքանիշի ղեկավարը։
Նրա խոսքով՝ նոր դիլերական կենտրոնը Երեւանում հնարավորություն կտա ամրապնդել կապը հայ հաճախորդների հետ եւ Հայաստանի ավտոշուկայում ապահովել արտադրության հետ ասոցացվող շքեղությունը։
«Bentley նոր ու գեղեցիկ ավտոսրահը եւ ոչ պակաս գեղեցիկ տեխսպասարկման կենտրոնը Հայաստանում կձեւավորեն LUXE դասի ավտոմեքենաների սպասարկման նոր մշակույթ։ Սպասարկումն առաջնակարգ կլինի ոչ միայն վաճառքի առումով, այլ նաեւ ծառայությունների, տեխնիկական սպասարկման եւ ձեռագործ աքսեսուարների լայն տեսականու պարագայում»,-իր հերթին նշել է Bentley Yerevan-ի գլխավոր տնօրեն Արտեմ Սիմոնյանը։
Նրա խոսքով՝ հայաստանյան ավտոսրահում ներկայացված է Bentley-ի համալիր հավաքածուն՝ մոդելների շարքում են Bentley-ն, Flying Spur-ը, Bentley Mulsanne-ը, Bentley Bentayga-ը, ինչպես նաեւ նորույթ՝ Bentley-Continental GT-ն։ Ավտոմեքենաների գինը տատանվում է 114 միլիոնից մինչեւ 270 միլիոն դրամի սահմաններում է (324,3 -561,3 հազար դոլար)։
«Բացառություն է Bentley Continental GT կուպեն, որը Հայաստանում կներկայացվի մոտ ժամանակներս՝ արտադրության ժամկետի պատճառով»,-հավաստիացրել է Արտեմ Սիմոնյանը։
Եվրոպայում Bentley-ի տարածաշրջանային տնօրեն Ռոբերտ Էնգսթլերի խոսքով՝ Bentley առաջատար համաշխարհային ապրանքանիշի ընդլայնումը Եվրոպայում ընկերության հիմնական հաջողություններից է էլիտար ավտոմեքենաների արտադրության ոլորտում։ «Սա կարեւոր օր է Bentley Motors-ի համար, եւ ուրախ ենք, որ ունենք հուսալի եւ պրոֆեսիոնալ գործընկեր՝ ի դեմս Դերժավա-Ս Գրուպի-ի»,-նշել է նա:
Նոր սրահը ձեւավորվել է Bentley-ի միջազգային կորպորատիվ ոճով, որտեղ ընկերության հարուստ պատմությունը ներդաշնակորեն միաձուլվել է դիլերական կենտրոնի ժամանակակից շքեղության տարրերի հետ։ Բացի այդ, սրահում կա անհատական գոտի, որտեղ հաճախորդները կարող են ըստ իրենց ճաշակի պատվիրել թափքի գույնը, կաշվի հարդարման տարբերակները եւ օգտվել ինչպես լայն տեսականուց, այնպես էլ մի շարք հնարավորություներից։