Հայաստանում արկածային տուրիզմի պահանջարկը տարեցտարի մեծանում է։ Այդ մասին Երեւանում ընթացող «In Tour Expo» եւ «SportWay» միջազգային ցուցահանդեսին NEWS.am-ի թղթակցի հետ զրույցում ասել է «Լեռ տուր» եւ «Լեգիոն» փեյթնբոլ ակումբ կազմակերպությունների վաճառքի մենեջեր Էդուարդ Միրզոյանը։
«Մեր կազմակերպությունն առաջարկում է այլընտրանքային տուրիզմի ամենահետաքրքիր տարբերակներից երկուսը։ Մեկը փեյնթբոլի խաղերի կազմակերպումն է, որն իրենից ներկայացնում է սպորտային զենքերով մրցումներ ամբողջովին անվտանգ գնդակներով։ Այսինքն, մեծ հաշվով, սա համարվում է զենքով մրցույթ, սակայն բոլորովին անվտանգ պայմաններում։ Իսկ «Լեռ տուրը» հանդիսանում է ջիփինգի եւ էքստրեմալ տուրիզմի կազմակերպություն եւ թե ներսի թե դրսի զբոսաշրջիկներին առաջարկում է վայելել էքստրիմի հաճույքը օֆֆրոդ արշավների ժամանակ եւ զգալ ադրենալինի մեծ չափաբաժին մեր կողմից առաջարկվող մեքենաների վարման ընթացքում»,- նշել է Միրզոյանը։
Նրա խոսքով, փեյնբոլի ակումբն արդեն 10 տարի է՝ գործում է։ «Կազմակերպության գործունեության ակտիվությունը տարեցտարի մեծանում է, այսինքն մեծանում է տուրիզմի այս տեսակի պահանջարկը։ Քանի որ տուրիստական կազմակերպությունների հետ համագործակցությունը եւս բարձր մակարդակի վրա է գտնվում, կարող ենք արձանագրել, որ տարեցտարի 20-30 տոկոս աճ ենք գրանցում զբոսաշրջիկների առումով»,- նշել է նա։
Էդուարդ Միրզոյանի խոսքով, մինչեւ վերջին տարիները հիմնականում զբոսաշրջիկներ էին օգտվում իրենց ծառայություններից, սակայն վերջին տարիներին միտում է նկատվում նաեւ հայերի մասնակցության առումով, մասնավորապես IT կազմակերպությունների ակտիվությունն է մեծ։ «Քանի որ փեյնբոլի մրցաշարը համարվում է սեզոնային մրցաշար, այսինքն ոչ բոլոր եղանակային պայմաններում է հնարավոր կազմակերպել մրցաշար, դեռ սեզոնը չի բացվել, բայց ապրիլ ամսին ունեցել ենք 4-5 մրցաշար, իսկ հաջորդ ամիսների համար ունենք պատվերներ մրցաշարի կազմակերպման համար»,- նշել է«Լեռ տուր» եւ «Լեգիոն» փեյթնբոլ ակումբ կազմակերպությունների վաճառքի մենեջերը։
Yerevan expo ցուցահանդեսային համալիրում ապրիլի 20-22-ին միաժամանակ ընթանում է 2 միջազգային ցուցահանդես՝ «In Tour Expo» եւ «SportWay» ցուցահանդեսները:
Այցելելով ցուցահանդեսներ, կարելի կլինի տեղեկանալ, թե որքանո՞վ է զբոսաշրջային Հայաստանը հասանելի եւ մրցունակ միջազգային զբոսաշրջային շուկայում, ի՞նչ նոր ու հետաքրքիր առաջարկներ ակնկալել 2018 թվականին ճանապարհորդելու համար, ի՞նչ մարզաձեւով մարզվել, ի՞նչ մարզահագուստ կրել: «InTour Expo» ցուցահանդեսին մասնակցում են ոլորտի շուրջ 90 ներկայացուցիչներ՝ Հայաստանից, Արցախից, Ռուսաստանից, Հունաստանից, Չեխիայից, Իրանից, Եգիպտոսից եւ այլ երկրներից: Ցուցահանդեսի շրջանակներում անցկացվելու են թվային մարքեթինգի, գաստրո-տուրիզմի եւ հյուրանոցային բիզնեսը առցանց տիրույթում ներկայացնելու վերաբերյալ սեմինարներ, ինչպես նաեւ զբոսաշրջային ոլորտի նորամուծություններին առնչվող մի շարք շնորհանդեսներ։ Խոսնակների թվում են արտերկրում հաջողության հասած հայ մասնագետներ Մայք Լազիեւը, Արմեն Կալաջյանը, Աննա Մազմանյանը եւ հատուկ հյուր՝ Ալեքսանդր Լապշինը:
Արդեն 5-րդ անգամ անցկացվող «In Tour Expo»-ին զուգահեռ այս տարի առաջին անգամ տեղի է ունենում նաեւ սպորտի ոլորտին նվիրված «SportWay» ցուցահանդեսը:
Ցուցահանդեսների ինֆորմացիոն հովանավորը NEWS.am-ն է: