Ռուսաստանի դաշնային անվտանգության ծառայությունը կանխել է ահաբեկչությունների շարք Ստավրոպոլում, որոնք ծրագրում էր իրականացնել «Իսլամական պետության» կողմնակիցը, հայտնում են գերատեսչության մամուլի ծառայությունից։
Նշվում է, որ հանցագործը «Իսլամական պետություն» խմբավորման պարագլուխ Աբու Բաքր ալ Բաղդադիին հավատարմության երդում է տվել։ Ուժայինների տվյալներով՝ նա ծրագրում էր «ռեզոնանսային ահաբեկչական գործողություններ իրականացնել հրազենային զենքի եւ ինքնաշեն պայթուցիկների կիրառմամբ»։
«Ահաբեկչական գործողությունների օբյեկտները պիտի դառնային Ստավրոպոլի երկրամասի կառավարության եւ անվտանգության տարածքային մարմնի շենքերը»,-նշել են գերատեսչությունում։
Ռուսաստանի դաշնային անվտանգության ծառայության ղեկավար Ալեքսանդր Բորտնիկովը հայտնել էր, որ նախորդ տարի ուժայինները կանխել են 25 ահաբեկչություն, եւս 4-ը ահաբեկիչներին հաջողվել է իրականացնել։
