ՀՀ քննչական կոմիտեի ԵՔՔՎ Կենտրոն եւ Նորք-Մարաշ վարչական շրջանների քննչական բաժնում ստացվել եւ վարույթ է ընդունվել հասարակության նկատմամբ բացահայտ անհարգալից վերաբերմունքով հասարակական կարգը կոպիտ կերպով խախտելու դեպքի առթիվ ՀՀ ոստիկանության Կենտրոնական բաժնում ՀՀ քրեական օրենսգրքի 258-րդ հոդվածի 1-ին մասով հարուցված քրեական գործը:
Քրեական գործի նյութերի ուսումնասիրությամբ պարզվել է, որ 2018 թվականի ապրիլի 20-ին՝ ժամը 10-ից մինչեւ ապրիլի 21-ի ժամը 01:30-ը, մի խումբ անձինք, արհամարելով վարքագծի համընդհանուր ճանաչում ստացած կանոնները, բարոյական եւ իրավական նորմերը, ինչպես նաեւ՝ այլ անձանց իրավունքներն ու ազատությունները, բացահայտ անհարգալից վերաբերմունք են դրսեւորել հասարակության նկատմամբ, չեն ենթարկվել նշված հանցավոր գործողությունները դադարեցնելուն ուղղված ոստիկանության աշխատակիցների օրինական պահանջներին։ Ակնհայտորեն կոպիտ կերպով խախտվել է հասարակական կարգը՝ բազմաթիվ ավտոմեքենաներով, դիտավորությամբ երթեւեկության կանոնների ակնհայտ խախտումներով անընդմեջ տեւական ժամանակ ավտոմեքենաների համապատասխան սարքավորումներով եւ ձայնային ազդանշաններ արձակելու համար նախատեսված միջոցներով բարձր ձայներ արձակելով լուրջ անհանգստություն են պատճառել Երեւան քաղաքի բազմաթիվ բնակիչների, այդ թվում գիշերային ժամերին խախտել են նրանց անդորրը՝ ձեւավորելով վերջիններիս համար վախի եւ տագնապի մթնոլորտ:
Խուլիգանություն կատարելու կասկածանքով ձերբակալվել է 5 անձ՝ Հ.Գեւորգյանը, Ն.Նազարյանը, Հ.Խուրշուդյանը, Ա.Ղարիբյանը, Ա.Ջաբաղյանը:
Նախաքննությունը շարունակվում է։
Երեք հոգու կալանավորել են անկարգությունների մեղադրանքով (ֆոտո)