Wild Safari ընկերությունը նորեկ է Հայաստանի զբոսաշրջային շուկայում եւ դեռ յուրացնում է հնարավոր երթուղիները, բայց արդեն շատ զբոսաշրջային ընկերություններ նրանց ծառայությունները ներառում են իրենց տուրերում:
«In Tour Expo» ցուցահանդեսի շրջանակում Wild Safari-ի աշխատակից Մերի Հովհաննիսյանը NEWS.am-ի թղթակցին պատմել է, որ ընկերությունը նորագույն CFMOTO կվադրոցիկլներով առաջարկում է էքստրիմ տուրեր Հայաստանի անանցանելի լեռնային շրջաններով:
Ներկայումս ընկերությունն առաջարկում է տուրեր Ծաղկաձորի եւ Հանքավայրի տարածքներում, սակայն ուղեւորությունների աշխարհագրությունը, նրա խոսքով, կընդլայնվի:
Wild Safari ընկերությունն ապահովում է «դրայվի եւ ադրենալինի սիրահարների» տեղափոխումը Երեւանից սաֆարիի վայր եւ հակառակ ուղղությամբ: Ընկերության հրահանգիչները հաճախորդներին տեղում կվադրոցիկլ վարել են սովորեցնում եւ նրանց են տրամադրում տեղանքի քարտեզը՝ պարզաբանելով երթուղու բոլոր խոչընդոտները: Բացի գեղեցիկ, կուսական վայրերով ուղեւորությունից, ճանապարհորդներին նաեւ առաջարկվում է ինքնուրույն խորոված պատրաստել եւ դիտել պատմական տեսարժան վայրերը:
Ընկերությունն առաջարկում է ստանդարտ փաթեթներ՝ 2 ժամյա ուղեւորություն երկու հոգու համար կվադրոցիկլով եւ VIP փաթեթներ՝ 2 ժամյա ուղեւորություն մեկ անձի համար: Խմբակային տուրերի համար գործում է զեղչերի համակարգ, ասել է Մերի Հովհաննիսյանը:
Հիշեցնենք, որ Yerevan expo ցուցադրական կենտրոնում ապրիլի 20-22-ը միաժամանակ անցկացվում են երկու միջազգային ցուցահանդեսներ՝ «In Tour Expo» եւ «SportWay», որոնք ներկայացնում են, թե որքան մարտչելի եւ մրցունակ է Հայաստանը համաշխարհայիյն զբոսաշրջային շուկայում եւ ինչով այն կարող է զարմացնել զբոսաշրջիկներին 2018-ին:
«InTour Expo»-ին մասնակցում են 90 ներկայացուցիչներ՝ Հայաստանից, Արցախից, Ռուսաստանից, Չեխիայից, Իրանից, Եգիպտոսից եւ այլ երկրներից:
Ցուցադրության շրջանակում անցկացվում են սեմինարներ՝ թվային մարքեթինգի, գաստրոտուրիզմի եւ հյուրանոցային բիզնեսի մասին, ինչպես նաեւ զբոսաշրջային մի շարք նոր արտադրանքների շնորհանդեսներ: Բանախոսների թվում են հայ մասնագետներ, որոնք արտասահմանում հաջողություն ունեն՝ Մայք Լազիեւը, Արմեն Քալաջյանը, Աննա Մազմանյանը, ինչպես նաեւ հատուկ հյուր Ալեքսանդր Լապշինը:
Ցուցահանդեսների տեղեկատվական հովանավորն է NEWS.amգործակալությունը: