Վարչապետ Սերժ Սարգսյանի եւ «Քայլ արա» նախաձեռնության ղեկավար, ԱԺ պատգամավոր Նիկոլ Փաշինյանի միջեւ բանակցություն չեղավ: NEWS.am-ի թղթակցի հետ զրույցում այս մասին հայտարարեց Երեւանի ավագանու «Ելք» խմբակցության անդամ Անահիտ Բախշյանը՝ անդրադառնալով այսօր առավոտյան կայացած կարճատեւ հանդիպմանը:
«Բանակցություն, որպես այդպիսին, չեղավ: Սերժ Սարգսյանի կողմից պետք է բոլորովին այլ բառապաշար լիներ: Մարդիկ երկխոսության գալիս են ինչ-որ բան անելու, իրար ընդառաջ քայլ անելու, իրար լսելու կամքով: Ես նման բան չտեսա»,- նշեց նա:
Բախշյանի խոսքով՝ արդեն 20 օր է՝ Սերժ Սարգսյանը լսում է ցուցարարների կարգախոսները, եւ փոփոխությունների համատեքստում պետք է խոսեր:
«Ես ասել եմ, նորից կոչ եմ անում, որ Սերժ Սարգսյանը Մարտի 1-ի դրոշակը չվերցնի իր վրա: Ես հիմա ժողովրդի մեջ եմ՝ քաղաքապետարանի դիմաց: Լիքը ժողովուրդ է կանգնած, էս ժողովրդին չի կարող հերթական անգամ հուսախաբ անել: Սարգսյանը պիտի խոսեր փոփոխության անհրաժեշտության մասին, որը պարզ տեսանելի է այսօր, այդ փոփոխության շուրջ ինքը պետք է սկսեր խոսակցությունը: Ուրիշ ճանապարհ չկա»,- հայտարարեց Անահիտ Բախշյանը:
