ՀՀ առողջապահության նախարարությունն ու «Առողջապահության կազմակերպիչների միավորում» հասարակական կազմակերպությունը խորը մտահոգություն են արտահայտում երկրում ստեղծված իրավիճակի կապակցությամբ՝ կոչ անելով ստեղծված իրավիճակը խաղաղ հանգուցալուծելու նպատակով գտնել ուղիներ՝ առաջնորդվելով հանդարտ եւ խոհեմ սկզբունքներով: Հայտարարությունում, մասնավորապես, ասվում է.
«Հանրապետությունում արդեն արմատացած ժողովրդավարական ավանդույթը մեր քաղաքացիներին հնարավորություն է տվել ազատ արտահայտելու իրենց կարծիքը, մտահոգություններն ու անհանգստությունները: Այսօր մեր երկրում արձանագրված հաջողությունների հետ մեկտեղ առկա շատ խնդիրներ ու դժվարություններ, որոնք հանգեցրել են անվստահության եւ մեր հայրենակիցների մի մասին ստիպել են բարձրացնել իրենց բողոքի ձայնը եւ դուրս գալ փողոց:
Հարգելով հանրահավաքի եւ երթերի մասնակիցների օրինական իրավունքները՝ ուզում ենք նշել, որ առկա իրավիճակը՝ մասնավորապես ճանապարհներ փակելը, խոչընդոտում է շտապ օգնության եւ առողջապահական հիմնարկների բնականոն աշխատանքը:
Կան բազմաթիվ հիվանդներ, որոնք պարբերաբար բժշկական կազմակերպություններ այցելելու անհրաժեշտմոթյուն ունեն՝ հետազոտվելու, բժշկական որեւէ միջամտություն կամ դեղորայք ստանալու նպատակով: Նման հիվանդների բուժման ընթացքին որեւէ ձեւով խոչընդոտելը կարող է անդառնալի հետեւանքներ ունենալ նրանց առողջության վրա:
Սիրելի հայրենակիցներ, իհարկե, մեր երկրում կան հրատապ լուծման կարոտ բազում հարցեր եւ խնդիրներ, սակայն հասարակության բեւեռացումը, թշնամանքի սերմանումը, անհանդուրժողականությունը կարող են խաթարել մեր երկրի՝ առանց այն էլ փխրուն անվտանգությունը:
Կոչ ենք անում ստեղծված իրավիճակը խաղաղ հանգուցալուծելու նպատակով գտնել ուղիներ՝ առաջնորդվելով հանդարտ եւ խոհեմ սկզբունքներով»: