«Ազատ դեմոկրատներ» կուսակցությունը խստորեն դատապարտում է այսօր խաղաղ ցուցարարների նկատմամբ ոստիկանության կողմից բռնի ուժի կիրառումը, Սահմանադրությամբ եւ ՀՀ օրենքներով Հայաստանի Հանրապետության քաղաքացու իրավունքը համարվող խաղաղ երթեր, ցույցեր, հավաքներ իրականացնելուն խոչընդոտող ոչ իրավաչափ գործողությունները:
Կուսակցության տարածած հայտարարությունում, մասնավորապես, նշվում է.
«Անթույլատրելի ենք համարում ՀՀ ԱԺ պատգամավորներ Նիկոլ Փաշինյանի, Սասուն Միքայելյանի, Արարատ Միրզոյանի եւ շարժման մյուս մասնակիցների ձերբակալությունները:
Կոչ ենք անում ՀՀ իշխանություններին անհապաղ ազատ արձակել ձերբակալվածներին եւ վերադառնալ բանակցային սեղանի շուրջ, փակուղի չմտցնել բանակցությունների հնարավորությունը, որի հանգուցալուծումը պետք է լինի խաղաղ, առանց բռնության եւ բացառապես քաղաքական ճանապարհով:
Մենք արձանագրում ենք, որ վերջին օրերին Երեւանում եւ Հայաստանի Հանրապետության մարզերում ընթացող բողոքի ակցիաները, հավաքները եւ երթերը բացառապես խաղաղ բնույթ են կրել: Իսկ խաղաղ անհնազանդության ակցիաները ժողովրդավարության հիմնական նորմերից բխող գործընթաց է, որին դեմ գնալու եւ բռնի ուժով կանխելու փորձերը սպանում են քաղաքացու հույսն ու հավատը վաղվա օրվա նկատմամբ, խարխլում ներքին համերաշխությունը՝ հարված հասցնելով ՀՀ-ում ժողովրդավարության հաստատման գործընթացին եւ ՀՀ միջազգային հեղինակությանը»: