Կորեայի Հանրապետությունն ու Հյուսիսային Կորեան ապրիլի 23-ին երկու երկրների առաջնորդների գագաթաժողովի պատրաստման աշխատանքային բանակցությունների երրորդ ռաունդ կանցկացնեն։ Հանդիպումը կկայանա սահմանային Փհանմունջոմ կետում։ Այս մասին հայտնում է ՏԱՍՍ–ը՝ վկայակոչելով Հարավային Կորեայի միավորման նախարարությանը։
Բանակցությունների օրակարգում են արարողակարգային հարցերի վերջնական համաձայնեցումը, այդ թվում՝ գագաթաժողովի անցկացման ժամանակը եւ միջոցառման անվտանգության ապահովումը։ Հանդիպման ժամանակ մինչեւ գագաթաժողովը բարձր մակարդակով լրացուցիչ բանակցություններ անցկացնելու որոշում կարող է կայացվել։
Կորեայի Հանրապետության նախագահ Մուն Չժե Ինը ապրիլի 22-ին իր օգնականների եւ համապատասխան պետական մարմինների ներկայացուցիչների հետ հանդիպում է անցկացրել գագաթաժողովի օրակարգի շուրջ։ Ենթադրվում է, որ հանդիպման ժամանակ քննարկվել է նաեւ հռչակագրի նախագիծը, որը կողմերը կստորագրեն գագաթաժողովի արդյունքում։
