Ադրբեջանի զինված ուժերը Արցախի հետ շփման գծում կենդանի ուժ եւ տեխնիկա է կուտակում: Այս մասին ապրիլի 23-ին մամուլի ասուլիսի ժամանակ ասաց պաշտպանության նախաար Վիգեն Սարգսյանը:
«Իրավիճակի մասին հայտարարվել է, հաղորդագրություն եւ տեսանյութ է տարածվել: Հակառակորդը հետեւում է մեր պետության մեջ ծավալվող գործընթացներին: Նեղ մասնագիտական գիտելիքներով օժտված լինելու կարիք չկա հասկանալու համար, որ ներքին անկայությունը բացում է նրանց գործողությունների ճանապարհը: Կոլեգիայի բացմանը երեկվա հայտարարությունը այս մասով էր: Սակայն մենք պարտավոր ենք հանրությանն այս սպառնալիքի մասին հիշեցնել»,- նշեց նախարարը՝ հավելելով, որ սա չի չեղարկում իր որոշումն ընդունելու յուրաքանչյուրի իրավունքը:
«Մեր հերթին մենք պետք է կատարենք մեր աշխատանքը: Մենք պետք է համաքաղաքացիներին նախազգուշացնենք վտանգի մասին: Եթե հակառակորդը տեսնում է, որ ներսում գործընթացներ կան, ոորնք պետությանը շեղում են առաջնահերթ խնդիրներից, կարող է դրսից ինչ-որ բան ձեռնարկելու փորձ կատարել: Երբ պետական մարմինները ոչ լիարժեք են գործում, պաշտպանության խնդիրը բարդանում է: Ներքին գործընթացները մեզ անհանգստացնում են, սակայն մեր խնդիրն այլ է: Կա ռեսուրսների կառավարման խնդիր: Ենթադրենք՝ ԱԳՆ շենքը շրջափակված է, ինչպես դա արդեն եղել է: Ի՞նչ եք կարծում՝ սա աշխատանքը սահմանափակո՞ւմ է: Զինկոմիսարիատները նման պայմաններում նորմալ կաշխատե՞ն»,- նշեց նախարարը:
Նրա խոսքով՝ շփման գծում կուտակումներ են գրանցվել: Զորավարժություններ են անցկացվել, որոնք «սահուն» անցել են կուտակման, հաճախակիացել են նաեւ վարժանքները: «Սա անհանգստություն է առաջացնում: Հաշվի առնելով մեր ներքին գործընթացները՝ մենք պարտավոր էինք հայտնել: Մենք մեր հասարակությանը չենք վախեցնում: Հասարակությունը պետք է վստահ լինի, որ հայկական բանակները մարտունակ են եւ պատրաստ ցանկացած խնդիր կատարել: Մենք պետք է մեր հասարակության հետ ազնիվ լինենք»,- նշեց Վիգեն Սարգսյանը:
