Խորհրդարանական ժողովրդավարության համար այնքան էլ լավ չէ, երբ կամարտահայտման ազատությունը հակասության մեջ է մտնում օրենքի պաշտպանության այլ տարրերի հետ, եւ իրավապահները ստիպված են միջամտել: Այս մասին ապրիլի 23-ին մամուլի ասուլիսի ժամանակ ասաց պաշտպանության նախարար Վիգեն Սարգսյանը՝ մեկնաբանելով Երեւանի վերջին իրադարձությունները:
Նրա խոսքով՝ խորհրդարանական ընդդիմությունը պետք է հասկանա, որ ինքն աշխատանքի այլ գործիքներ ունի, քան հրապարակն է: «Սա մեր ժողովրդավարության համար փորձաշրջան է»,- նշեց նա: Պատասխանելով պատգամավորների նկատմամբ ոստիկանների գործողությունների մասին հարցին՝ նախարարը նշեց, որ օրենքով հստակ գործընթացներ են սահմանված, եւ օրենքի տառը, ինչպես համոզված է նախարարը, կպահպանվի:
«Ինչ վերաբերում է ոստիկանության գորողություններին՝ հասկանում եմ, որ ասածս կարող է բացասական արձագանք առաջացնել, սակայն տարբեր երկրներում ցանկացած զանգվածային միջոցառման ժամանակ ոստիկանությունը որքան էլ պատրաստված լինի, նրա գործողությունները կարող են հայտնվել համաչափության կամ ուժի կիրառման անհրաժեշտության գերազանցման սահմանին: Շատ կաեւոր է, որ եթե սխալներ կան, դրանք հայտնաբերվեն: Սակայն կարեւոր է, որպեսզի ոստիկանության նկատմամբ ապրիորի «չորոշվի», որ այն օրենքի պահանջը խախտել է: Ոստիկանները կարեւոր եւ վտանգավոր աշխատանք են կատարում: Եվ անգործության հետեւանքները կարող են ոստիկանների գործողություններից ավելի վտանգավոր լինել: Համեմատեք ժողովրդավարության երկրների հետ, Ֆրանսիայից եւ Գերմանիայից մինչեւ ԱՄՆ, Մեծ Բրիտանիա եւ համեմատեք՝ Հայաստանի ոստիկանությունը ոչ մի նոր բան չի հորինել: Հայկական ոստիկանությունը գործում է նույն մեթոդներով, եւ ի պատիվ ոստիկանության՝ պետք է ասել նրա պրոֆեսիոնալիզմի աճի մասին»,- կարծում է նախարարը:
