«Օրինաց երկիր» կուսակցության նախագահ Արթուր Բաղդասարյանը դիմում է հրատապ, համընդգրկուն քաղաքական օրակարգ ձեւավորելու կոչով։
Հայտարարությունում ասվում է. «Երեւանում եւ հանրապետության տարբեր մարզերում շարունակվում են տասնյակ հազարավոր մարդկանց ցույցերը եւ խաղաղ անհնազանդության գործողությունները: Իրավիճակը շարունակում է մնալ լարված եւ պայթյունավտանգ:
Ելնելով վերոգրյալից, կոչ եմ անում ՀՀ իշխանություններին, քաղաքական ուժերին եւ հանրությանը` վերահաստատելով նախօրեին «Օրինաց երկիր» կուսակցության երեք հայտարարությունները, որով միակ եւ ընդունելի քաղաքական հանգուցալուծում էր առաջարկվում արտահերթ ընտրությունների կազմակերպումը, դիմում եմ հրատապ, համընդգրկուն քաղաքական օրակարգ ձեւավորելու կոչով` նոր եւ արտահերթ խորհրդարանական ընտրություններ անցկացնելու շուրջ:
Հաշվի առնելով Նիկոլ Փաշինյանի քանիցս հրապարակայնորեն հնչեցված տեսակետը, համաձայն որի նրա կողմից որպես քաղաքական հանգուցալուծման վերջնակետ է դիտարկվում նոր, արտահերթ խորհրդարանական ընտրությունների կազմակերպումը, վերստին կոչ ենք անում իշխանություններին եւ բոլոր շահագրգիռ ուժերին ձեւավորել հրատապ քաղաքական օրակարգ` նշված հարցի շուրջ։
Որպես Հայաստանի Ազգային ժողովի նախկին նախագահ, Ազգային անվտանգության խորհրդի նախկին քարտուղար եւ 20-ամյա խորհրդարանական քաղաքական հետագիծ ունեցող կուսակցության նախագահ պատրաստ եմ, հնարավորության դեպքում, հանդիպելու Նիկոլ Փաշինյանի հետ եւ քննարկելու իր իսկ առաջարկությունը` իրավիճակի խաղաղ հանգուցալուծման առնչությամբ արտահերթ խորհրդարանական ընտրությունների կազմակերպման հարցով օրակարգ ձեւավորելու շուրջ»,- ասվում է հայտարարության մեջ: