Ապրիլի 22-ին, ժամը 16.00-ին, հիվանդանոցից ոստիկանության Աշտարակի բաժնում հաղորդում է ստացվել, որ Աշտարակ-Երեւան ճանապարհի Ճանապարհային ոստիկանության անշարժ պահակետի մոտից «դեմքի շրջանի սալջարդ, երկու ատամների կոտրվածք, գանգոսկրի կոտրվածք` հարցականով», «կրծքավանդակի աջ կեսի սալջարդ, որովայնի տրավմա» եւ «ձախ ստորին վերջույթի մկանների ձգվածություն» ախտորոշումներով բուժօգնության են տեղափոխվել ոստիկանության 3 ծառայող:
Պարզվել է, որ ժամը 15.30-ի սահմաններում, Աշտարակ-Երեւան ճանապարհի ՃՈ անշարժ պահակետում, ծառայություն իրականացնելու ընթացքում, «Իմ քայլը» նախաձեռնության մասնակիցների կողմից նրանք ծեծի են ենթարկվել եւ տեղափոխվել «Աշտարակ» բժշկական կենտրոն:
Նույն օրը «Աշտարակ» բժշկական կենտրոնից հաղորդում է ստացվել, որ ժամը 20.40-ին բուժօգնության են դիմել ոստիկանության եւս 2 ծառայող` «ձախ սրունքի սալջարդ» եւ «կրծքավանդակի սալջարդ» ախտորոշումներով:
Պարզվել է որ վերը նշված ծառայողները վնասվածքները ստացել են «Իմ քայլը» նախաձեռնության մասնակիցների կողմից, Աշտարակ-Երեւան ճանապարհի ՃՈ անշարժ պահակետի մոտ ծեծի ենթարկվելու հետեւանքով:
Բացի այդ ցուցարարների կողմից վնաս է պատճառվել նաեւ ՃՈ անշարժ պահակետի մոտ կայանված, ոստիկանության հաշվեկշռում գտնվող «ՈՒԱԶ» եւ «Տոյոտա» մակնիշի ավտոմեքենաներ, ինչպես եւ Աշտարակի համայնքապետարանի հաշվեկշռում գտնվող «ԶԻԼ» մակնիշի ավտոմեքենան:
Ձեռնարկվում են միջոցառումներ հանցագործություն կատարած անձանց ինքնությունը պարզելու եւ հայտնաբերելու ուղղությամբ:
Վնասի չափը պարզվում է:
Կատարվում է քննություն:
