News
Լրահոս
News
Երեքշաբթի
Հոկտեմբեր 16
Տեսնել լրահոսը


11 օր շարունակվող ցույցերից եւ հրաժարականի պահանջներից հետո վարչապետ Սերժ Սարգսյանը հայտարարեց հրաժարական տալու մասին: Տարածված հայտարարությունում նա դիմել է քաղաքացիներին՝ նշելով, որ փողոցի պայքարն իր պաշտոնավարման դեմ է, եւ ինքը կատարում է այդ պահանջը: Երկրի ղեկավարի պաշտոնում նա «վերջին անգամ դիմել է բոլոր քաղաքացիներին, փողոցներում «Մերժիր Սերժին» կոչով օր ու գիշեր կանգնածներին եւ փակ փողոցներով դժվարությամբ աշխատավայր հասնողներին, սահմանին կանգնած զինվորներին ու սպաներին, իր զինակից եւ կուսակից ընկերներին, քաղաքական բոլոր ուժերին և գործիչներին»: Սերժ Սարգսյանը նաեւ նշել է, որ ստեղծված իրավիճակը մի քանի լուծում ունի, բայց դրանցից ոչ մեկին չի գնալու, պարզապես թողնելու է երկրի ղեկավարի՝ Հայաստանի վարչապետի պաշտոնը: «Փողոցի շարժումն իմ պաշտոնավարման դեմ է: Ես կատարում եմ ձեր պահանջը»,- հավելել է Սերժ Սարգսյանը:

Նախագահ Արմեն Սարգսյանն ընդունել է կառավարության հրաժարականը: Սահմանադրության համաձայն՝ 7-օրյա ժամկետում խորհրդարանական խմբակցությունները պետք է վարչապետի թեկնածու առաջադրեն: Ազգային ժողովն էլ վարչապետին կընտրի պատգամավորների ընդհանուր թվի ձայների մեծամասնությամբ:

Մինչ այդ, վարչապետի լիազորությունները, օրենքի համաձայն, կկատարի առաջին փոխվարչապետ Կարեն Կարապետյանը: Կառավարությունն այսօր արտահերթ նիստ է գումարել եւ հաստատել կարգը: Կարապետյանը գործընկերներին բնականոն գործունեությունն անխափան շարունակելու կոչ է արել:

Այսօր առավոտից Երեւանում երթերը վերսկսվել էին: Մի շարք բուհերի ուսանողներ դասադուլ էին հայտարարել ու փողոց դուրս եկել: Ճանապարհին նրանց են միացել նաեւ մի խումբ զինվորականներ՝ զինված ուժերի խաղաղապահ բրիգադից: Ավելի ուշ պաշտպանության նախարարությունը հայտարարեց, որ ցուցարարներին միացած զինծառայողների նկատմամբ, օրենքով սահմանված կարգով, ամենախիստ պատիժն է կիրառվելու:

Իսկ նախօրեին Սերժ Սարգսյանն ու Նիկոլ Փաշինյանը կարճատեւ հանդիպում ունեցան: Վարչապետն անակնկալի էր եկել՝ սրահում մեծ թվով լրագրողների տեսնելով: Նա նշեց, որ դժվար է այդ պայմաններում բանակցել, իսկ Փաշինյանը հակադարձեց. չի եկել բանակցելու, եկել է քննարկելու նրա հրաժարականի եւ իշխանությունն անցնցում փոխանցելու պայմանները: Սերժ Սարգսյանը սա շանտաժ որակեց:

Վարչապետի հեռանալուց հետո Փաշինյանը գնաց ցուցարարներին միանալու. բողոքի երթն այս անգամ որոշել էին սկսել Էրեբունի վարչական շրջանից: Արցախի փողոցում, սակայն, սաղավարտներով ու վահաններով զինված ոստիկանները փակել էին ճանապարհը: Ուժայինները ծխանռնակներ նետեցին ցուցարարների ուղղությամբ, բերման ենթարկեցին Նիկոլ Փաշինյանին: Հետո բերման ենթարկվեցին նաեւ պատգամավորներ Սասուն Միքայելյանն ու Արարատ Միրզոյանը:

Այսօր արդեն երկրում ստեղծված իրավիճակը քննարկելու համար նախագահ Արմեն Սարգսյանի մոտ էր հավաքվել երկրի բարձրագույն ղեկավարությունը, հանդիպմանը ներկա էին նաեւ Ամենայն Հայոց կաթողիկոսն ու Արցախի նախագահը: Խորհրդակցությունից հետո Կարեն Կարապետյանը լրագրողներին ասաց, որ գնում է Նիկոլ Փաշինյանին հանդիպելու, բացի այդ, դիմելու է գլխավոր դատախազին՝ պատգամավորներին անձեռնմխելիությունից զրկելու պահանջով միջնորդությունը հետ կանչելու հորդորով: Ձերբակալվածների պահման վայրում Կարեն Կարապետյանի հետ հանդիպումից հետո Նիկոլ Փաշինյանին, Սասուն Միքայելյանին եւ Արարատ Միրզոյանին ազատ արձակեցին: Այդտեղից Փաշինյանը գնաց միանալու ցուցարարներին: Ժամը 19:00-ին արդեն Հանրապետության հրապարակում բազմահազարանոց հանրահավաք սկսվեց:

Արցախի պաշտպանության նախարարությունը շարունակում է տեղեկացնել հակառակորդի ակտիվության մասին: Գերատեսչության տեղեկացմամբ՝ շփման գծի ադրբեջանական կողմում կենդանի ուժի եւ զինտեխնիկայի տեղաշարժեր եւ կուտակումներ են: Առաջնագիծ է այցելել նաեւ երկրի պաշտպանության նախարար Լեւոն Մնացականյանը: Նախարարի հավաստմամբ՝ իրավիճակը լարված է, բայց գտնվում է Արցախի բանակի վերահսկողության ներքո:

Դամասկոսում հրթիռակոծության հետեւանքով հայ է զոհվել: Բերիայի Հայոց թեմի ազգային առաջնորդարանից տեղեկացնում են, որ զոհվածը Անդրանիկ Հեմիտյանն է: Ահաբեկչական խմբավորումները հրթիռակոծել են Դամասկոսի Սահնայա շրջանը:

Ապրիլի 23-ին դոլարը, եվրոն եւ ռուբլին էժանացել են: Դոլարի փոխարժեքը կազմել է 480 դրամ, եվրոյինը՝ 587, ռուբլունը՝ 7 դրամ 74 լումա, ֆունտինը՝ 670 դրամ:

Ապրիլի 24-26-ը հանրապետությունում սպասվում է առանց տեղումների եղանակ: Օդի ջերմաստիճանը 6-7 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +5+7, ցերեկը՝ +18+20 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 15.10.2018
Երդմնակալությունը նախորդներից տարբեր դարձրեց նաեւ Նավասարդ արքեպիսկոպոս Կճոյանի հեղափոխական «տերմինաբանությամբ» օրհնանքը...
Օրվա գլխավոր լուրերը՝ «մեկ տողով». 11.10.2018
Արտահերթ խորհրդարանական ընտրությունները Հայաստանում տեղի կունենան դեկտեմբերի 9-ին կամ 10-ին...
Օրվա գլխավոր լուրերը՝ «մեկ տողով»
Հոկտեմբերի 10–ին մահացել է «Սասնա ծռեր» խմբի անդամ, «Միայնակ գայլ» անունով հայտնի Արայիկ Խանդոյանը...
Օրվա գլխավոր լուրերը՝ «մեկ տողով». 09.10.2018
Օրը սկսվեց ՀՀԿ և ԲՀԿ խմբակցությունների ներկա և նախկին անդամ՝ 16 պատգամավորների հայտարարությունով...
Օրվա գլխավոր լուրերը՝ «մեկ տողով». 08.10.2018
Ներքաղաքական իրավիճակում կտրուկ շրջադարձ գրանցվեց երկուշաբթի...
Օրվա գլխավոր լուրերը՝ «մեկ տողով». 05.10.2018
Փարիզի սրտում՝ Հաշմանդամների տան պատմական համալիրում, այսօր հրաժեշտ տվեցին սիրո լեգենդար երգիչ Շառլ Ազնավուրին...
Ամենաշատ
Partner news