Խելամիտ եւ իմաստուն քայլ։ «Ազատություն» ռադիոկայանի հետ զրույցում այսկերպ է մեկնաբանել Սերժ Սարգսյանի հրաժարականի որոշումը ԱԺ ՀՀԿ խմբակցության ղեկավար Վահրամ Բաղդասարյանը։
«Բոլոր մնացած խնդիրներից խուսափելու համար ավելի բարձր ինքը գնահատեց իր պետության շահերը, քան իր անձնական շահերը: Սա քաղաքական գործչի, պետական գործչի կատարած քայլ էր: Քաղաքական գործընթաց է․ կսպասենք, կհետեւենք զարգացումներին»,- ասել է նա՝ նշելով, որ վերջին օրերի մեր քննարկումներից հետո իր համար այն անսպասելի չէր. «Քննարկումներ եղել էր, բայց նման զարգացումների դեպքում անակնկալ չէր, որ կլինի նման որոշում, որովհետեւ մենք հավատում ենք նախկին նախագահի՝ Սերժ Սարգսյանի իմաստուն մոտեցումներին, նրա պետական մտածելակերպին: Եվ մենք գիտեինք, որ նմանատիպ քայլ կլինի, որովհետեւ հակառակ քայլը շատ վատ հետեւանքներ կունենար»:
Ըստ Բաղդասարյանի, հակառակը ուժի կիրառումն էր, ինչին Սարգսյանը չգնաց։ Սերժ Սարգսյանը շարունակելու է լինել ՀՀԿ ղեկավարն ու առաջնորդը։
Խոսելով բանակցությունների մասին՝ վահրամ Բաղդասարյանը նշել է, թե քաղաքականության մեջ ոչինչ չեմ բացառում: «Բայց համբերեք զարգացումներին, այսօր քաղաքական մեծամասնությունը դա Հանրապետական կուսակցությունն է, եւ ինքը կորոշի, թե ինչ թեկնածու առաջադրի»,- ասել է նա նշելով, որ թեկնածուն պետք է որոշի Ազգային ժողովը: Իսկ բանակցությունները սկսվելու են ապրիլի 25-ից։
