Այնպիսի տպավորություն է ստեղծվում, որ ամբողջ հայկական զբոսաշրջային արդյունաբերությունն աշխատում է տարեցների համար՝ հայկական սփյուռքի տարեցների համար: Այս մասին «In Tour Expo» զբոսաշրջային ցուցահանդեսի շրջանակում դասախոսության ժամանակ հայտարարել է թվային մարքեթինգի հայտնի մասնագետ Մայք Լազիեւը:
Նախ, նրա խոսքով, մարքեթինգը վիքիպեդիա չէ եւ պետք չէ զբոսաշրջային կայքերում տեղադրել տեղեկատվություն, որը կարելի է գտնել վիքիպեդիայում: Նա խորհուրդ է տվել հայկական տուր օպերատորներին ակտիվորեն աշխատել այնպիսի զբոսաշրջային պորտալների հետ, ինչպիսիք են՝ TripAdvisor-ը, Booking.com-ը եւ Quora-ն (հարցերի եւ պատասխանների կայք): Բայց միեւնույն ժամանակ պետք է կարողանալ գրել պարզ, մատչելի լեզվով, այլ ոչ թե փորձել Եղիշե Չարենց ձեւանել եւ կես էջանոց նախադասություններ գրել:
«Երբ մենք սկսում են ինչ-որ բան գրել, մենք ասում ենք, որ պետք է դա շատ լուրջ անենք: Մենք պետք է դա այնքան լուրջ անենք, որ ես հասցնեմ տխրել դրանից եւ ցանկանամ քնել», - ասել է նա՝ հավելելով, որ ընդհակառակը՝ տեքստերով պետք է դրականը փոխանցել:
Մասնագետի խոսքով՝ չի կարող լինել այնպիսի գովազդ, որը բոլոր զբոսաշրջիկներին կստիպի գալ:
«Կան մարդիկ, որոնք այստեղ են գալիս համեղ ուտելու համար: Կան մարդիկ, որ ցանկանում են հեծանիվով Արագած բարձրանալ: Կան նաեւ մարդիկ, որոնք այստեղ են գալիս Խորվիրապ գնալու համար», - ասել է նա՝ հավելելով, որ հայկական տուր օպերատորներն իրենց գովազդներով կորցնում են երիտասարդ զբոսաշրջիկներին:
Ուստի նրանք պետք է սկզբում առանձնացնեն թիրախային լսարանը, որի հետ ցնականում են աշխատել, իսկ հետո յուրաքանչյուր խմբի համար ռազմավարություն մշակեն:
Իսկ մեզ մոտ նրա խոսքով, երիտասարդներին առաջարկում են նույն էքսկուրսիաները, ինչ տարեցներին: Շատ հայեր արդեն ամեն ինչ գիտեն Հայաստանի, մասին, գիտեն Նարեկացու մասին, իսկ նրանց տալիս են զբոսավար, որը պատմում է Նարեկացու մասին:
Ռուսները գալիս են Հայաստան համեղ սնվելու համար, իրանցիները՝ ուտել-խմելու, ակումբներ այցելելու համար: Ուրեմն պետք է գրել դրա մասին: «Որովհետեւ եթե նա եկել է, կերել-խմել է, գոհ ու երջանիկ է, նրան հեշտությամբ կարելի է շատ այլ բաներ վաճառել», - նկատել է նա:
Եվս մեկ սխալն, ըստ Մայք Լազիեւի, այն է, որ «մենք մեզ շատ լուրջ ենք ներկայացնում»:
«Մենք այնքան ծանր ենք, որ այդ ծանրությունը դնում ենք մեր այցելուների ուսերին: Ոչ, մենք ոչ մի թեթեւ բան չենք առաջարկում: Մենք կնկարենք մեծ սար, կողքը կդնենք մեծ հյուրանոց, ներսում էլ մեծ մահճակալ: Մեծ, ծանր, լուրջ: Իսկ դուք ուզո՞ւմ եք ամբողջ կյանքում ծանր իրեր տեսնել: Ձանձրալի՞ է չէ», - ասել է նա:
Հիշեցնենք, որ Yerevan expo ցուցադրական կենտրոնում ապրիլի 20-22-ը միաժամանակ անցկացվում էին երկու միջազգային ցուցահանդեսներ՝ «In Tour Expo» եւ «SportWay», որոնք ներկայացնում էին, թե որքան մարտչելի եւ մրցունակ է Հայաստանը համաշխարհայիյն զբոսաշրջային շուկայում եւ ինչով այն կարող է զարմացնել զբոսաշրջիկներին 2018-ին:
«InTour Expo»-ին մասնակցում էին 90 ներկայացուցիչներ՝ Հայաստանից, Արցախից, Ռուսաստանից, Չեխիայից, Իրանից, Եգիպտոսից եւ այլ երկրներից:
Ցուցահանդեսների տեղեկատվական հովանավորն էր NEWS.am գործակալությունը: