Ռուսաստանի դեմ պատժամիջոցները, հնարավոր է, խստացվեն, նշված է G7 երկրների ԱԳ նախարարների համատեղ հայտարարության մեջ, փոխանցում է «Վզգլյադը»:
Նշված է, որ Ռուսաստանը պետք է կատարի մինսկյան համաձայնագրերը: G7 երկրները դրա հետ են կապում «Դոնբասի հարցով տնտեսական պատժամիջոցների երկարացումը»: Շեշտվում է, որ պատժամիջոցները չեղյալ կհամարվեն «միայն այն դեպքում, եթե Ռուսաստանն ամբողջությամբ կատարի իր պարտավորությունները»: Ըստ որում՝ G7 երկրները «պատրաստ են սահմանափակող նոր միջոցներ ընդունել», եթե «դա պահանջեն» Մոսկվայի գործողությունները:
G7 երկրներն աջակցել են Սոլսբերիի հարցում բրիտանական դիրքորոշմանը եւ Ռուսաստանից պահանջել «նախկինում չհայտարարված «Նովիչոկ» ծրագրի լիակատար բացահայտում»: G7 երկրները կարծում են, որ «ամենայն հավանականությամբ», Ռուսաստանն է պատասխանատվություն կրում Սոլսբերիի միջադեպի համար: Նրանք հայտարարել են, որ համաձայն են Մեծ Բրիտանիայի գնահատականների հետ:
G7 երկրներն աջակցել են Սիրիային հասցված ԱՄՆ-ի, Մեծ Բրիտանիայի եւ Ֆրանսիայի հարվածները՝ հայտարարելով, որ այն «սահմանափակող էր, համաչափ եւ անհրաժեշտ»: Նախարարների կարծիքով՝ հարվածը կիրառվել է Սիրիայի իշխանությունների կազմակերպած քիմիական հարձակմանն ի պատասխան «դիվանագիտական հնարավորությունների սպառումից հետո»:
Նախօրեին հաղորդվել էր, որ G7 ԱԳ նախարարները պատրաստվում են Ռուսաստանին հասցեագրված խիստ հայտարարություն կատարել:
