Ճիշտն ասած՝ ես շատ փորձառու մարդ չեմ քաղաքականության մեջ, բայց ինչը որ ստացվեց՝ շատ գեղեցիկ ստացվեց: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում ասաց Առողջապահության նախարարի պաշտոնակատար Լեւոն Ալթունյանը:
Ինչ վերաբերում է իր հետագա ճակատագրին, Ալթունյանն ասաց. «Կապրեմ այնպես, ինչպես որ անցյալ 59 տարին, այսինքն` երջանիկ երեւանցի: Հազար ու մի բան կարող եմ անել. ապահովագրություն արել եմ, բժշկություն արել եմ, երեւի թե մի օգտակար բան հնարեմ»:
Հարցին, թե իր կարծիքով ո՞րն էր Սերժ Սարգսյանի հրաժարականի պատճառը, Լեւոն Ալթունյանը պատասխանեց. «Իրավիճակը փոխվում է, եւ փորձառու քաղաքական գործիչը միշտ ընդունում է այն որոշումը, որն այդ պահին ամենաճիշտն է։ Մարդն իր հղումի մեջ ժողովրդին կոնկրետ ասաց՝ որպեսզի ամեն ինչ անցնի անարյուն, համերաշխ եւ տրամաբանական ուղիով: Գնահատականները շատ շուտ է տալ, բայց, այնուամենայնիվ, Նիկոլ Փաշինյանն արտահայտեց ժողովրդի ակտիվ մեծամասնության իղձերը»:
Հիշեցնենք, որ երեկ՝ ապրիլի 23-ին Սերժ Սարգսյանը հրաժարական տվեց վարչապետի պաշտոնից:
«Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանը հայտարարել է, որ ապրիլի 25-ին շարունակելու են բանակցությունները՝ իշխանության անցնցում փոխանցման շուրջ:
