ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի եւ ՀՀ վարչապետի պաշտոնակատար Կարեն Կարապետյանի բանակցությունները, որոնք նախատեսված էին ապրիլի 25-ի առավոտյան, չեն կայանալու, չեղարկվել են։
Այդ մասին NEWS.am-ին հայտնեց «Քաղաքացիական պայմանագիր» կուսակցության մամուլի պատասխանատու Տիգրան Ավինյանը։
Նա, սակայն, բանակցությունների չեղարկման պատճառները չհայտնեց։
Ավինյանի խոսքով, վաղը երեկոյան, ժամը 19-ին Հանրապետության հրապարակում մեկնարկելու է շարժման հանրահավաքը։
Նշենք, որ բանակցությունները նախատեսված էին առավոտյան ժամը 11-ին։ Այսօր Նիկոլ Փաշինյանը օտարերկրյա լրագրողների հետ մամուլի ասուլիսում հայտնել էր, թե Հանրապետական կուսակցությունից ոչ ոք չի լինելու Հայաստանի վարչապետ։ «Հանրապետական կուսակցությունից որեւէ թեկնածու չի լինելու Հայաստանի վարչապետ։ Հայաստանում հանրապետական կուսակցության իշխանությունն ավարտվել է։ Այդ կուսակցությունը վերածնելու որեւէ փորձ չի հաջողելու»,- ասել էր Փաշինյանը։
