Այո, հասարակությունն իրավունք ունի այսօր հարցնել, թե ինչու են «Ծառուկյան» խմբակցության պատգամավորների մի մասը ԱԺ-ում կողմ քվեարկել վարչապետի պաշտոնում Սերժ Սարգսյանի թեկնածությանը: յս մասին, այսօր՝ ապրիլի 25-ին, ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած երթի ժամանակ «Ազատության» հետ զրույցում նշեց «Ծառուկյան» խմբակցության պատգամավոր Նաիրա Զոհրաբյանը:
«Գիտեք, որ ես եւ իմ մի քանի ընկերներ քվեարկել ենք դեմ Սերժ Սարգսյանի թեկնածությանը եւ մնում եմ այն կարծիքին, որ մեր գործընկերները կողմ չպետք է քվեարկեին: Իմ խիղճը, իմ արժանապատվությունը թելադրել է դեմ քվեարկել:
Ես կարծում եմ, որ յուրաքանչյուրն ունեցել է ինչ-որ մոտիվացիա նրան կողմ քվեարկելու, ինձ համար անընդունելի ու անհասկանալի մոտիվացիա: Փորձում են մարդկային ինչ-ինչ պատճառաբանություններ բերել, իմ գործընկերն են, չեմ ուզում բացասական բան ասել»,-հայտարարեց Զոհրաբյանը:
Նշենք, որ ԱԺ-ում Սերժ Սարգսյանին վարչապետի պաշտոնում ընտրելու ժամանակ «Ծառուկյան» խմբակցության 31 պատգամավորներից միայն 12 դեմ քվեարկել Սերժ Սարգսյանին:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:
