Կոտայքի մարզում, ապրիլի 24-ին, սպանության փորձ է տեղի ունեցել. ժամը 22։00-ի սահմաններում «Չարենցավան» բժշկական կենտրոնից ոստիկանության Չարենցավանի բաժին ահազանգ է ստացվել, որ «կրծքավանդակի աջ կեսի հրազենային թափանցող վերք» ախտորոշմամբ իրենց մոտ է տեղափոխվել երիտասարդ տղա։
Shamshyan.com-ի փոխանցմամբ, ոստիկաններն ու քննիչները պարզել են, որ հրազենային վիրավորում ստացած քաղաքացին Կոտայքի մարզի Արզական գյուղի բնակիչ՝ 23-ամյա Հովհաննես Թ.-ն է։ Իրավապահները պարզել են նաեւ, որ նա հիվանդանոց է տեղափոխվել Ալափարս-Չարենցավան ավտոճանապարհին գտնվող «Հայաստանի էլեկտրացանցեր» ընկերության ենթակայանին հարակից, ԽՍՀՄ տարիներից կառուցված ջերմոցների կողմից։
Իրավապահները Չարենցավանի հիվանդանոցի բակից ապօրինի հրազեն պահելու կասկածանքով Չարենցավանի ոստիկանություն են բերման ենթարկել վիրավորի համագյուղացի՝ 53-ամյա Հարություն Թ.-ին։ Նրա մոտ հայտնաբերվել է ակոսափող հրազեն, իսկ Հ. Թադեւոսյանը հայտարարել է, որ ժամեր առաջ իր ազգականը զանգահարել է իրեն եւ հայտնել, որ «Բդո» մականվամբ քաղաքացին հրազենային վնասվածք է պատճառել իր որդի Հովհաննեսին՝ նկատի ունենալով հիվանդանոց տեղափոխված Հ. Թադեւոսյանին եւ այդ ժամանակ ինքը ինքնապաշտպանության նպատակով իր անվամբ հաշվառված նշված հրազենը վերցրել է իր հետ եւ ժամանել է Չարենցավանի բժշկական կենտրոն։
Աղբյուրի տեղեկություններով՝ Հարություն Թադեւոսյանն աշխատում է Գիտությունների ազգային ակադեմիայի հանգստյան տանը՝ որպես տնօրեն։