«Իմ քայլը» նախաձեռնության եւ «Քաղաքացիական պայմանագիր» կուսակցության առաջնորդ, ԱԺ «Ելք» խմբակցության պատգամավոր Նիկոլ Փաշինյանի գլխավորած շարժմանը մի շարք համայնքների ղեկավարներ են միացել։ Այդ մասին Հանրապետության հրապարակում ընթացող հանրահավաքում հայտարարել է «Քաղաքացիական պայմանագիր» կուսակցության անդամ Արայիկ Հարությունյանը։
Նրա խոսքով, շարժմանը միացել են Նորապատի համայնքապետ Վահրամ Խաչատրյանը, Նորավանի համայնքապետ Արթուր Միքայելյանը, Լուկաշինի համայնքապետ Կարեն Մկրտչյանը, Արարատի մարզի Մարմարաշենի համայնքապետ Էդվարդ Հակոբյանը, Տավուշի մարզի Կողբի համայնքապետ Արսեն Աղաբաբյանը։
Նա նշել է, որ ավելի ուշ ավելի շատ անձինք են միանալու։
Նշենք, որ ավելի վաղ Նիկոլ Փաշինյանը հայտնել էր, թե իրենց միացել են քննչական կոմիտեից մի քննիչ, ոստիկանության մի կապիտան։