93-ամյա ֆրանսիահայ երգիչ Շառլ Ազնավուրի համերգը Սանկտ Պետերբուրգում չեղարկվել է երգչի առողջական վիճակի պատճառով։ Այս մասին չորեքշաբթի հայտնել են «Օկտյաբրսկի» մեծ համերգասրահից, որտեղ ապրիլի 25-ին պետք է կայանար նրա համերգը, փոխանցում է ՏԱՍՍ-ը։
«Շառլ Ազնավուրի համերգը երաժշտի առողջական վիճակի պատճառով տեղափոխվում է 2019 թվականի ապրիլի 9-ին։ 2018 թվականի ապրիլի 25-ի տոմսերը վավերական են 2019 թվականի ապրիլի 9-ի համար»,-հայտնել են համերգասրահում։
«Օկտյաբրսկի» համերգասրահի տնօրեն Էմմա Լավրինովիչը հայտնել է, որ երգչի ինքնազգացողությունը վատացել է փորձի ժամանակ։ Նրա խոսքով՝ 93-ամյա երաժշտին հոսպիտալացրել են, նրա առողջական վիճակի մասին դեռ ոչինչ հայտնի չէ։