Էլեկտրոնիկայի հարավկորեական արտադրող Samsung Electronics Co.-ի օպերացիոն շահույթը 2018 թվականի 1-ին եռամսյակում աճել է մինչեւ ռեկորդային ցուցանիշ, ըստ որում՝ ընկերությունը ռեկորդը բարելավում է 4-րդ եռամսյակն անընդմեջ, փոխանցում է «Ռոսբալտը»:
Օպերացիոն շահույթն աճել է 58 տոկոսով՝ մինչեւ 15,64 տրլն վոն մեկ տարի առաջվա 9,9 տրլն վոնի համեմատությամբ:
Ըստ որում՝ հունվար-մարտին Samsung-ի զուտ շահույթն աճել է 1,5 անգամ եւ կազմել 11,69 տրլն վոն (10,8 մլրդ դոլար) 2017 թվականի նույն ժամանակահատվածի 7,68 տրլն վոնի համեմատությամբ:
Անցած եռամսյակում ընկերության դրամական մուտքերն անցյալ տարվա 1-ին եռամսյակի 50,55 տրլն վոնից աճել են մինչեւ 60,56 տրլն վոն:
S&P Global Market Intelligence-ի հարցման մասնակից փորձագետները 1-ին եռամսյակում Samsung-ի զուտ շահույթը կանխատեսել էին միջինը 11 տրլն վոն մակարդակում, դրամական մուտքերը՝ 60,2 տրլն վոնի:
Նշվում է, որ Samsung-ի օպերացիոն շահույթի մոտ 70 տոկոսը բաժին է ընկել միկրոչիպերի թողարկմանը, ըստ որում դրամական մուտքերում ստորաբաժանման բաժինը կազմում է գրեթե երրորդ մասը, ինչը վկայում է այս բիզնեսի շատ մեծ շահութաբերության մասին: