Ուֆայում ծննդատան այրվող շենքից հրշեջները տարհանել են մոտ 250 մարդու, այդ թվում՝ 56 նորածնի: Այս մասին հայտնել են շրջանային ԱԻՆ-ից, փոխանցում է «Վզգլյադը»:
Փրկարարների տեղեկություններով՝ հրշեջ պահանության կետը Մոսկվայի ժամանակով 12.35-ին հաղորդում է ստացել Կուվատովի անվան հիվանդանոցի շենքի ազդանշանային համակարգի գործելու մասին: Անհապաղ դեպքի վայր են ուղարկվել հրշեջները: Հրդեհը գնահատվել է բարդության 3-րդ մակարդակով:
«Ժամանելուն պես պարզվել է, որ կրակը բռնկվել է առաջին հարկում գտնվող մանկաբարձագինեկոլոգիական մասնաշենքի հերթապահ բուժքրոջ կետում: Մարման ընթացքում շենքից տարհանվել է 238 մարդ, այդ թվում՝ 56 երեխա: Տարհանվածներին տեղավորել են կից վիրաբուժական մասնաշենքում եւ մոտակա ծննդատներում»,- նշված է փրկարարների հաղորդագրության մեջ:
Ոչ ոք չի տուժել, կրակը չեզոքացվել է Մոսկվայի ժամանակով 1.28-ին: Տեղում աշխատում են ԱԻՆ եւ հրշեջ փորձագիտական լաբորատորիայի մասնագետները:
Հիշեցնենք, որ 2012 թվականի օգոստոսին հաղորդվել էր, որ ծննդատուն է այրվել Պետերբուրգի կենտրոնում, մարդկանց տարհանել էին, հրդեհին տրվել էր բարդության բարձր մակարդակ:
Պետերբուրգյան թիվ 1 ծննդատան հրդեհի հետեւանքով տուժածներ չէին եղել: Սակայն գիշերով նորածիններին գրկած, հագին մեկ խալաթով ծննդատնից դուրս բերվող մայրիկներն աննախանձելի վիճակում էին: Արդյունքում՝ բոլորին տեղավորել են այլ հիվանդանոցներում, այս ծննդատանը արտակարգ դեպքից հետո այլեւս ոչ մի երեխա չի ծնվել: