Բելառուսի արտաքին գործերի նախարար Վլադիմիր Մակեյը ապրիլի 26-ին հանդիպել է Արտաքին կապերի եվրոպական ծառայության Եվրոպայի եւ Կենտրոնական Ասիայի հարցերով կառավարիչ Թոմաս Մայեր Հարթինգի հետ։ Այս մասին հայտնել են երկրի ԱԳՆ մամուլի ծառայությունում, փոխանցում է «Բելտան»։
Թոմաս Մայեր Հարթինգը գլխավորում է Եվրամիության պատվիրակությունը, որը կմասնակցի ապրիլի 26-27–ը կայանալիք Բելառուս–ԵՄ համակարգող խմբի հինգերորդ նիստին։
Հանդիպման մասնակիցները քննարկել են երկկողմ հարաբերությունների ներկա վիճակը, Բելառուսի մասնակցությունը ԵՄ–ի «Արեւելյան գործընկերություն» նախաձեռնությանը։ Վլադիմիր Մակեյը եւ Թոմաս Մայեր Հարթինգը նաեւ ուշադրություն են դարձրել Արեւելյան Եվրոպայում տիրող իրավիճակին եւ մարդու իրավունքների հարցերում փոխգործակցության հեռանկարներին։