Այսօր՝ ապրիլի լույս 26-ի գիշերը ճանապարհային ոստիկանության առաջին սպայական գումարտակի ծառայողները ուժեղացված ծառայություն են իրականացրել մայրաքաղաքում։
Այս առնչությամբ ոստիկանության տարածած հաղորդագրության մեջ նաեւ նշվում է.
«Արդյունքում՝ պահպանվող հատուկ տարածք է տեղափոխվել 18 ավտոմեքենա, որոնք եղել են առանց հաշվառման համարանիշերի։ Ապրիլի լույս 25-ի գիշերվա ուժեղացված ծառայության ընթացքում էլ պահպանվող հատուկ տարածք էր տեղափոխվել 17 ավտոմեքենա։
Բացի համարանիշերը հանելուց վարորդներից ոմանք եղել են ալկոհոլի ազդեցության տակ, կոպտորեն խախտել են ճանապարհային երթեւեկության կանոնները՝ բացահայտ անհարգալից վերաբերմունք դրսեւորելով երթեւեկության մյուս մասնակիցների նկատմամբ։ Կարգազանց վարորդները ենթարկվել են վարչական պատասխանատվության։
Ի դեպ, եւ՛ ճանապարհային ոստիկանություն, եւ՛ ոստիկանության տարածքային ստորաբաժանումներ, եւ՛ ոստիկանության հասարակայնության հետ կապի եւ լրատվության վարչություն դիմում են բազմաթիվ քաղաքացիներ՝ վերջին օրերին երթեւեկության կանոնները կոպտորեն խախտող վարորդներին կարգի հրավիրելու պահանջով։
Ճանապարհային ոստիկանությունը լինելու է հետեւողական եւ խիստ։ Ուժեղացված ծառայությունն իրականացվելու է պարբերաբար։
Հարգելի վարորդնե՛ր, պահպանեք ճանապարհային երթեւեկության կանոնները․ դրանք բխում են մեր իրավագիտակից հասարակության շահերից»:
Անցած գիշեր ՃՈ-ն Երեւանում հայտնաբերել է առանց պետհամարանիշի 18 մեքենա