Եթե 2018թ. առաջին երեք ամիսներին միասին վերցված Երեւան քաղաքում արձանագրվել է 133 ճանապարհատրանսպորտային հանցագործության դեպք, ապա միայն վերջին 10 օրում՝ 62: Այս մասին հաղորդագրություն է տարածել ՀՀ գլխավոր դատախազությունը:
Հաղոդրագրությունում ասվում է.
«Արդեն տեղեկացվել է 2018թ. ապրիլի 23-ին երեկոյան Երեւան քաղաքի Սարալանջի փողոցում տեղի ունեցած ավտովթարի մասին, որի հետեւանքով մահացել է մեկամյա երեխա եւ տարբեր աստիճանի վնասվածքներ է ստացել երկու ուղեւոր:
Նշված, ինչպես նաեւ վերջին օրերին արձանագրված ճանապարհատրանսպորտային հանցագործությունների փաստերով քննության տվյալները վկայում են, որ դրանց զգալի մասն առանց հաշվառման համարանիշերի կամ դրանք թաքցված ավտոմեքենաներով, ճանապարհային երթեւեկության այլ կանոնների ակնհայտ եւ կոպտագույն խախտումներով երթեւեկելու, այդ կերպ վարքագծի համընդհանուր կանոնները, բարոյական եւ իրավական նորմերը, այլ անձանց իրավունքներն ու ազատություններն արհամարհելու, հասարակության նկատմամբ անհարգալից վերաբերմունք դրսեւորելու ուղղակի հետեւանքն են:
Հարկ ենք համարում նշել, որ եթե 2018թ. առաջին երեք ամիսներին միասին վերցված Երեւան քաղաքում արձանագրվել է 133 ճանապարհատրանսպորտային հանցագործության դեպք, ապա միայն վերջին 10 օրում՝ 62: Ընդ որում՝ եթե այդ հանցագործությունների հետեւանքով նշված եռամսյակի ընթացքում մահվան ելք է ունեցել 17 դեպք, ապա միայն վերջին 10 օրում՝ 5 դեպք:
ՀՀ ոստիկանությանը հանձնարարվել է ուժեղացնել հսկողությունը ճանապարհային երթեւեկության կանոնների պահպանման նկատմամբ եւ ձեռնարկել օրենքով նախատեսված բոլոր միջոցները ճանապարհատրանսպորտային հանցագործություններ կատարած անձանց բացահայտման եւ քրեաիրավական միջոցների խստացման ուղղությամբ»:
