Միացյալ Նահանգների նախագահ Դոնալդ Թրամփը Կոնգրեսին ներկայացրել է ԿԺԴՀ-ի նկատմամբ ԱՄՆ-ի քաղաքականության ռազմավարությունը, ինչպես դա պահանջում է ԱՄՆ պաշտպանական բյուջեն, փոխանցում է «ՏԱՍՍ»-ը՝ վկայակոչելով Սպիտակ տունը: «Ինչպես դա պահանջում է օրենքը, ես ուղարկում եմ ձեզ 2018 թվականի պաշտպանության բյուջեի 1256-րդ կետով պահանջվող հաշվետվությունը»,- նշվում է Թրամփի՝ կոնգրեսի ղեկավարությանն ուղղված նամակում:
Փաստաթղթի այս բաժնում նշվում է, որ «այս օրենսդրական ակտի՝ ուժի մեջ մտնելուց առավելագույնը 90 օր անց նախագահը պետք է Կոնգրեսին զեկույց ներկայացնի Հյուսիսային Կորեայի վերաբերյալ Միացյալ Նահանգների ռազմավարության մասին»: Նշենք, որ Թրամփը պաշտպանական բյուջեն ստորագրել է 2017 թվականի դեկտեմբերի 12-ին:
Օրենսդիրներն ԱՄՆ-ի առաջնորդից պահանջել էին, որպեսզի վերջինս զեկույցում «գնահատական տա Հյուսիսային Կորեայի կողմից ԱՄՆ-ի ազգային անվտանգության շահերին սպառնացող հիմնական վտանգներին», ինչպես նաեւ՝ Փհենյանի եւ Մոսկվայի միջեւ հարաբերությունների ներկայիս վիճակին եւ հեռանկարներին: Սպիտակ տունը բուն զեկույցը դեռ չի հրապարակել: