Այն, որ Կարեն Կարապետյանը չի եկել հանդիպման, նշանակում է, որ ՀՀԿ-ում անորոշ վիճակ է, որովհետեւ երեկ նրանք հայտարարում էին, որ պատրաստ են բանակցությունների առանց որեւէ նախապայմանների, բայց ինչպես տեսնում եք Կարեն Կարապետյանի տեղը հիմա զբաղեցնում է իմ ուսապարկը: Այս մասին, այսօր՝ ապրիլի 27-ին, «Մարիոթ» հյուրանոցում հայտարարեց ԱԺ «Ելք» խմբակցության պատգամավոր, «Իմ քայլը» նախաձեռնության առաջնորդ Նիկոլ Փաշինյանը:
Հիշեցնենք, որ երեկ Փաշինյանը Կարեն Կարապետյանին առաջարկել էր այսօր հրապարակային բանակցություններ սկսել «Մարիոթ» հյուրանոցում, սակայն վերջինս չի եկել:
«Մեր դիրքորոշումը հայտնի է, մենք կարծում ենք, որ ժողովրդի հաղթանակը պետք է արձանագրվի նաեւ դե յուրե: Այսինքն հարցն այն է՝ արդյոք ՀՀԿ-ն ուզո՞ւմ է լուծել ճգնաժամը: Եթե վարչապետ ընտրվի ՀՀԿ-ական, ապա ճգնաժամը լուծում չի ստանա: Մենք կշարունակենք մեր խաղաղ գործողությունները եւ կփորձենք բացատրել ՀՀԿ-ականներին, նաեւ Կարեն Կարապետյանին, ինչպես բացատրեցինք Սերժ Սարգսյանին, որ չեն հասկանում Հայաստանում ստեղված քաղաքական իրավիճակը»,-ասաց Նիկոլ Փաշինյանը:
Նրա խոսքով, մայիսի 1-ին, երբ ԱԺ-ում տեղի է ունենալու վարչապետի ընտրության հարցի քննարկումը, ինքը կանխատեսում է 100 հազարավոր ՀՀ քաղաքացիներ Երեւանի փողոցներում. «Մենք այս պահից կոչ ենք անում բոլոր քաղաքացիներին այդ օրը առավոտյան ժամը 8-ին լինել Երեւանում, հեղեղել Երեւանի փողոցներն ու հրապարակները, այդ թվում ԱԺ-ի հարակից փողոցները»:
Հարցին, թե ի՞նչ խնդիր է լուծում Կարեն Կարապետյանը, որ չի գալիս բանակցությունների, Փաշինյանը պատասխանեց. «Ես կարծում եմ Կարեն Կարապետյանը վստահ չէ իր բանակցային ուժերին, իսկ եթե վստահ չէ իր բանակցային ուժերին, ինչպե՞ս է նա պատրաստվում բանակցել Ղարաբաղի հարցում»:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:
Արդեն երեկ՝ ապրիլի 26-ին, Փաշինյանը Կարեն Կարապետյանին հրավիրել էր ապրիլի 27-ին, ժամը 12-ին «Արմենիա Մարիոթ» հյուրանոցում՝ սկսելու բանակցությունների երկրորդ փուլը:
Վարչապետի պաշտոնակատար Կարեն Կարապետյանի մամուլի խոսնակ Արամ Արարատյաննն այսօր հայտարարել է, որ Կարեն Կարապետյանն անհեռանկարային է համարում Նիկոլ Փաշինյանի հետ «բանակցությունները»՝ մերժելով հանդիպումը:
