Հարավային Կորեան եւ Կորեայի Ժողովրդա-Դեմոկրատական Հանրապետությունը (ԿԺԴՀ) դադարեցնում են բոլոր թշնամական գործողությունները միմյանց դեմ: Այս մասին նշվում է երկրների ղեկավարների կողմից ստորագրված հայտարարության մեջ, փոխանցում է «ՏԱՍՍ»-ը: Հռչակագրում նշվում է, որ ԿԺԴՀ-ն եւ Հարավային Կորեան հաստատել են, որ իրենց ընդհանուր նպատակը Կորեական թերակղզու ապամիջուկայնացումն է:
Երկրները կշարունակեն ամենաբարձր մակարդակով ակտիվ երկխոսությունը: Հարավային Կորեայի եւ ԿԺԴՀ-ի զինված ուժերը նույնպես պայմանավորվել են շարունակել մշտական շփումները, այդ թվում նաեւ՝ պաշտպանության գերատեսչությունների ղեկավարների մակարդակով: Բացի այդ, Կեսոնում օպերատիվ կապի համատեղ կետ կստեղծվի:
Հռչակագրի համաձայն՝ երկրները համաձայնել են լուծել հումանիտար խնդիրները, այդ թվում նաեւ՝ կորեական ընտանիքների վերամիավորման խնդիրը: Ի թիվս այլ հարցերի՝ ԿԺԴՀ-ն եւ Հարավային Կորեան համաձայնել են սկսել երկու երկրների երկաթգծերի միացման աշխատանքները: