Նիկոլ Փաշինյանի եւ Կարեն Կարապետյանի երկրորդ հանդիպումը նույնպես չկայացավ: Փաշինյանը վարչապետի պաշտոնակատարին հանդիպման հրավեր էր ուղղել երեկ Հանրապետության հրապարակում կայացած հանրահավաքի ընթացքում՝ նշելով մեկ պայման. այն պետք է անցկացվի լրատվամիջոցների ներկայությամբ: Ավելի ուշ Կարեն Կարապետյանի խոսնակը նշել է, որ հերթական հրավերը նախորդից պրակտիկորեն չի տարբերվում: Հետո էլ հանդիպումից հրաժարվելու պատճառների մասին «Շանթ» հեռուստաալիքին տված հարցազրույցում խոսել է նաեւ Կարեն Կարապետյանը:
Իսկ Նիկոլ Փաշինյանը, ամեն դեպքում, գնացել է «Արմենիա Մարիոթ» հյուրանոց եւ զրուցել լրագրողների հետ: Երեկվա հանրահավաքի ընթացքում Նիկոլ Փաշինյանը նաեւ հայտարարել էր, որ եթե ինքը չընտրվի Հայաստանի վարչապետ, ապա ոչ ոք չի ընտրվի: Այսօր, սակայն, նա վստահեցրել է, որ պաշտոնակռիվ չի անում: ՀՀԿ խմբակցության պատգամավորների հետ հանդիպումից հետո լուրեր տարածվեցին, թե Սերժ Սարգսյանն ակնարկել է, որ վարչապետի թեկնածու կարող է լինել նաեւ Ռոբերտ Քոչարյանը: Փաշինյանը դա լուրջ չի համարում: Իսկ եթե Հանրապետական կուսակցությունը, ամեն դեպքում, անցկացնի վարչապետի իր թեկնածուին, իսկ հետո արտահերթ խորհրդարանական ընտրությունների հարց բարձրանա, Փաշինյանի խոսքով, կբոյկոտեն քվեարկությունը:
Կարապետյան-Փաշինյան հանդիպման տապալումն այսօր մեկնաբանել է նաեւ ՀՀԿ խոսնակ Էդուարդ Շարմազանովը: Նա խոսել է, մասնավորապես, հանդիպմանը լրատվամիջոցների ներկայության եւ բանակցություններն ուղիղ հեռարձակելու պահանջի մասին: Շարմազանովը դա Ազգային անվտանգության հարց է համարում:
Մայիսի 1-ին Ազգային ժողովի հատուկ նիստում կայանալիք վարչապետի ընտրության ժամանակ «Ելք»-ը «Ծառուկյան» եւ Դաշնակցություն խմբակցությունների պատգամավորների աջակցություն հույսն ունի: Դաշնակցությունն առայժմ այդ մասին հստակ ոչինչ չի հայտնել: Այսօր տարածած հայտարարությամբ միայն կոչ է արել «համախոհաբար միասնական քաղաքական օրակարգ ձեւավորել եւ համաձայնվել ժողովրդի վստահությունը վայելող միասնական թեկնածուի շուրջ»:
Գագիկ Ծառուկյանի խոսնակն էլ այսօր հայտարարել է, որ վաղը «Ծառուկյան» դաշինքի առաջնորդն անձամբ հանդես կգա հայտարարությամբ: Մինչ այդ, արդեն լուրեր կան, որ «Ծառուկյան» խմբակցությունն ուզում է վարչապետի թեկնածու առաջադրել հենց Գագիկ Ծառուկյանին:
Նիկոլ Փաշինյանն այսօր Երեւանում բողոքի գործողությունների դադար էր հայտարարել: Նա իր կողմնակիցների հետ Գյումրիում էր: «Իմ քայլը» նախաձեռնության մասնակցիները Գյումրի են մեկնել ավտոերթով: Ճանապարհին ավտոշարասյունը պարբերաբար կանգառներ է կատարել, իսկ Աշնակ գյուղում շարժման մասնակիցներին դհոլ-զուռնայով են դիմավորել:
Արդեն Գյումրիում բազմահազար մարդկանց մասնակցությամբ հանրահավաք է տեղի ունեցել: Նիկոլ Փաշինյանը ներկայացրել է առաջիկա ծրագրերը: Վաղը հանրահավաք է լինելու Վանաձորում, կիրակի՝ ապրիլի 29-ին նոր թափով լայնածավալ գործողություններ են անցկացվելու Երեւանում: Իսկ մայիսի 1-ին Փաշինյանը հորդորել է առավոտյան ժամը 8:00-ից հեղեղել Երեւանի փողոցները. հիշեցնենք, որ այդ օրն Ազգային ժողովում կայանալու է վարչապետի ընտրությունը:
Երեւանի ավագանու այսօրվա նիստը հանգիստ մթնոլորտում է անցել: Նոր կարգի համաձայն՝ լրագրողները նիստին հետեւել են ոչ թե դահլիճում, այլ կից սրահից: «Ելք»-ը բոյկոտել էր ավագանու նիստը: Ի դեպ՝ օրերս խմբակցությունը քաղաքապետ Տարոն Մարգարյանի հրաժարականն էր պահանջել:
Իսկ «Երկիր Ծիրանի»-ի անդամներն օրակարգային բոլոր հարցերի քննարկումների ժամանակ ունեցած ելույթներում խոսել են ներքաղաքական խնդիրների մասին: Նրանք պարբերաբար լրացուցիչ ժամանակ են խնդրել նիստը վարող Տարոն Մարգարյանից: Քաղաքապետն ի վերջո հեգնել է:
Պատմական հանդիպում. միջազգային հանրությունն ու մամուլն այսպես են բնորոշել Հյուսիսային եւ Հարավային Կորեայի առաջնորդների հանդիպումը: Կիմ Չեն Ընն ու Մուն Չժե Ինը հանդիպել են Փհանմունջոմ սահմանապահ կետում: Սա Կորեաների ղեկավարների՝ ավելի քան 10 տարվա ընթացքում առաջին հանդիպումն է: Նրանք միմյանց ձեռք են սեղմել՝ յուրաքանչյուրը սահմանի իր կողմում կանգնած: Կողմերը կառուցողական բանակցությունների եւ երկու Կորեաների պատմության մեջ նոր էջ բացելու հույս են հայտնել: Հենց ապառազմականացված Փհանմունջոմ գոտում էլ կայացել է միջկորեական պատմական գագաթնաժողովը: Հարավային Կորեայի նախագահի խոսքով՝ երկրները համաձայնել են, որ իրենց միջեւ պատերազմ չի լինելու:
Հյուսիսային եւ Հարավային Կորեաների ղեկավարները նաեւ հռչակագիր են ստորագրել, որի համաձայն՝ երկու երկրները դադարեցնում են միմյանց դեմ բոլոր թշնամական գործողությունները: Ղեկավարները նաեւ համաձայնեցրել են ընդհանուր նպատակ՝ Կորեական թերակղզու ապամիջուկայնացում, խոստացել են լուծել հումանիտար խնդիրները, այդ թվում՝ կորեական ընտանիքների վերամիավորման հարցը: Ապառազմականացված գոտու սահմանազատման գծում Կիմ Չեն Ընն ու Մուն Չժե Ինը նաեւ սոճի են տնկել՝ որպես խաղաղության եւ բարգավաճման խորհրդանիշ:
Իսկ համացանցում արագորեն տարածվել է Հյուսիսային Կորեայի առաջնորդի ավտոմեքենան ուղեկցող թիկնապահների տեսանյութը: Օգտատերերն այն թեկնապահների «առավոտյան վազք» են անվանել, նաեւ կատակել, թե դրանից հետո ԱՄՆ նախագահ Դոնալդ Թրամփն այսուհետ կպահանջի, որ իրեն նույնպես այդ կերպ ուղեկցեն:
Արմեն Ջիգարխանյանի ընկերը հերքել է լուրերը, թե դերասանը կոմայի մեջ է: Գործարար Արթուր Սողոմոնյանի հավաստմամբ՝ Ջիգարխանյանը վերջին օրերին թուլություն էր զգում, աշխատանքի չէր գնում: Ասում է՝ հրաժարվում էր բժշկի դիմել, ընդհանրապես չի սիրում հիվանդանոցում գտնվել: Սակայն, ի վերջո, համոզել են: Սողոմոնյանը հավաստել է նաեւ, որ բժիշկները որեւէ լուրջ բան չեն ախտորոշել. որոշ խնդիրներ կան, բայց դրանք տարիքի հետ են կապված: Արմեն Ջիգարխանյանը շուտով պատրաստվում է թատրոն վերադառնալ:
Ապրիլի 27-ին դոլարը թանկացել է, եվրոն՝ շուրջ 3 դրամով էժանացել: Դոլարի փոխարժեքը կազմել է 482 դրամ, եվրոյինը՝ 583, ռուբլունը՝ 7 դրամ 71 լումա, ֆունտինը՝ 666 դրամ:
Ապրիլի 28-ին հանրապետության շրջանների զգալի մասում ժամանակ առ ժամանակ տեղումներ են սպասվում, առանձին հատվածներում հնարավոր է կարկուտ: Օդի ջերմաստիճանը 4-5 աստիճանով կնվազի: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +11+13, ցերեկը՝ +22+24 աստիճան տաքություն:
