Վարչապետի ընտրությանը ՀՀԿ-ն աջակցելու է, բայց ինչ քանակով կաջակցի, ոնց կաջակցի, չեմ կարծում, որ դա էական է. էականն այն է, որ 53 ձայնը ապահովվի եւ մեկ երրորդի վստահությունն ունեցող անձնավորությունը դառնա վարչապետ: Այս մասին այսօր՝ մայիսի 3-ին լրագրողների հետ զրույցում ասաց ԱԺ փոխնախագահ Էդուարդ Շարմազանովը:
«Մի բան պետք է հասկանալ, որ մենք երկիր չունենք՝ ցնցումների տանելու: Այն, ինչ ասել ենք, ուժի մեջ է, ես ինչ-որ խոսում եմ, մանավանդ՝ երկրում տիրող ներքաղաքական եւ արտաքին քաղաքական իրավիճակի եւ վարչապետի թեկնածուի վերաբերյալ, ունեցել եմ հայեցակարգային գնահատականներ եւ ունեմ: Իմ կարծիքը չեմ փոխել: Ինչ վերաբերում է խմբակցության կարծիքին, որ աջակցելու ենք 1/3-ի ստորագրությունն ունեցող վարչապետի թեկնածուին եւ չպետք է թույլ տալ, որ Հայաստանը ունենա քաղաքական ճգնաժամ եւ մայիսի 8-ին ունենալու ենք վարչապետ, այդ ելույթում ամեն ինչ ասված է: Մարդ կա՝ կարդում է, չի տեսնում, մարդ կա՝ չի ուզում կարդալ, չի տեսնում»,- ասաց նա:
Շարմազանովն ընդգծեց, որ իր կարծիքը չի փոխվել, այն բացարձակապես քաղաքական է, որեւէ անձնական գնահատականներ չկան:
«Աստված տա՝ իմ մտահոգությունները, որոնք ես որպես քաղաքացի եւ ԱԺ պատգամավոր ունեմ, կփարատվեն, ու յուրաքանչյուր կառավարություն բացարձակապես կարդարացնի մեր ժողովրդի հույսերը: Քաղաքականության մեջ կան հաջողություններ, կան թերություններ, հաղթնակներ եւ ձախողումներ: Ռուզվելտն ասում էր՝ եթե դու մտել ես քաղաքականություն եւ քո մաշկը ռնգեղջյուրի մաշկից բարակ է, ապա մի մտիր: Քաղաքականությունը միայն իշխանություն չէ, բա մեր ընդդիմադիր գործընկերներն ի՞նչ ասեն, որ 25 տարի ընդդիմության մեջ են: Այդ իմաստով ես իմ կարծիքը չեմ փոխել, իմ սկզբունքները չեմ փոխել, բայց չեմ կարծում, որ պետք է հայտնի կենդանու համառությամբ իրականությունը չտեսնել եւ գնալ, գլուխը խփել պատին»,- հայտարարեց Շարմազանովը:
