ՀՀ վարչապետի պաշտոնակատար Կարեն Կարապետյանը Մամուլի ազատության համաշխարհային օրվա կապակցությամբ շնորհավորական ուղերձ է հղել
«Զանգվածային լրատվական միջոցների հարգելի՛ աշխատակիցներ, լրագրողներ,
Շնորհավորում եմ Մամուլի ազատության համաշխարհային օրվա կապակցությամբ եւ մաղթում, որ ձեր միտքն ու գրիչը մշտապես ուղղված լինեն Հայաստանի հզորացմանը։
Մենք բոլորս պարտավոր ենք ամեն մեկս մեր տեղում անել հնարավոր ամեն ինչ՝ մեր երկիրն ավելի լավը, ավելի ուժեղ դարձնելու գործում, եւ այս պրոցեսում դուք շատ մեծ առաքելություն ունեք:
Դուք եք այն ուժը, որը պարտականություն ունի ոչ միայն հասարակությանը հուզող հարցերը եւ խնդիրները բարձրաձայնելու, այլ նաեւ հայրենասեր եւ իր երկրի ապագայի համար անհանգիստ քաղաքացու կերպարի ձեւավորման գործում, քանի որ ի վերջո ամեն ինչի հիմքում կայծն աչքերում մարդն է:
Քաղաքական ուժերի, իշխանության եւ ընդդիմության, քաղաքացիական հասարակության հետ մեկտեղ դուք էլ եք պատասխանատու մեր երկրում ավելի հանդուրժող միջավայր ձեւավորելու հարցում՝ մի միջավայրի, որտեղ մենք կլսենք եւ կընկալենք դիմացինի կարծիքը, անգամ եթե համաձայն չենք դրա հետ, ավելի բարի լինենք, իրար ավելի սիրով եւ հարգանքով կվերաբերվենք: Նման հանդուրժող միջավայր ձեւավորելը բոլորիս պարտքն է:
Կրկին շնորհավորում եմ ձեզ մասնագիտական տոնի կապակցությամբ եւ բոլորիդ գարնանային լավ տրամադրություն եմ մաղթում¦,-ասել է նա: