Հայաստանում տեղի ունեցող ներքաղաքական զարգացումներն իրենց ազդեցությունն են ունեցել զբոսաշրջության ոլորտի զարգացումների վրա: «Արմենպրես»-ի փոխանցմամբ՝ այս մասին լրագրողների հետ զրույցում ասել է Զբոսաշրջության պետական կոմիտեի նախագահ Զարմինե Զեյթունցյանը:
«Զբոսաշրջությունն ամենազգայուն ոլորտն է, ամեն ինչ կարող է ազդել զբոսաշրջության վրա՝ լինի երկրաշարժ, բնական աղետ, քաղաքական որևէ իրադարձություն՝ այն ազդում է զբոսաշրջության վրա: Ունենք բազմաթիվ տվյալներ, որ եղել են զբոսաշրջային այցերի չեղարկումներ, ունենք տվյալներ, որ զբոսաշրջիկներն ինքնաթիռից իջել և անմիջապես հետ են վերադարձել իրենց երկիր: Ունենք նաև տվյալներ, որ զբոսաշրջիկները եկել ու ցույցերի են մասնակցել, սրանք ընդամենը էմպիրիկ դիտարկումներ են, իսկ մենք մինչև թվեր չունենանք՝ չեմ կարող հստակ տվյալներ նշել»,- ասել է Զարմինե Զեյթունցյանը:
Նա ենթադրում է, որ ապրիլին, մայիսին եւ հունիսին որոշակի անկում կնկատվի զբոսաշրջության ոլորտում, որովհետև անմիջական ռեակցիան միշտ բացասական է լինում: «Հույս ունեմ, որ հետագայում ամեն ինչ խաղաղ կավարտվի, և այսօր էլ ցույց տվեցինք, որ մենք խաղաղասեր ժողովուրդ ենք: Այդ պարագայում, այն տեղեկատվությունը, որն այսօր հաղորդվում է ամբողջ աշխարհում Հայաստանի մասին, կունենա նաև դրական հետևանքներ»,- ասել է կոմիտեի նախագահը:
Զեյթունցյանը, միաժամանակ, նշել է, որ ճանապարհների փակման հետևանքով ստացել են բազմաթիվ ահազանգեր, զբոսաշրջիկներ են եղել, որ մնացել են Վայքում. «Երեկ եղել է դեպք, երբ 30-40 զբոսաշրջիկ իջել է օդանավակայան, տեսել ճանապարհը փակ է, անմիջապես տոմս են ձեռք բերել ու հետ գնացել»: